2541/2026-2027 

Kolasib, 7th October, 2026: Nimin chawhnu khan ruihhlo ngaite enkawlna Jordan Centre, Sethawn chu hawnna leh Pathian hnena hlanna inkhawm neih a ni a. He hun hi Rev. Dr. K. Lallawmzuala, Executive Secretary i/c Synod Social Front chuan a kaihruai a. Health & Family Welfare leh Social Welfare, Women and Child Development Department Minister Pi Lalrinpuii chuan khuallian niin a tel pui . Mizoram Synod Moderator Rev. John Raldosanga'n Pathian hnenah hlanin thuchah a sawi bawk.

Khuallian, Social Welfare Minister Pi Lalrinpuii chuan Jordan centre chu a vei takzet  a ni tih  leh an nupa pawha tawngtainaa an lo dil thin a nih thu a sawi a. Minister a nih tirh a Sorkar in a enkawl lai  khan a  theih ang angin enkawl tu tur  tha leh rintlak a zawn ruk thu sawiin, Synod hotute a lo biak kual thu a sawi a; ama mimal ang chuan he hmun hi Synod-in enkawl se a duh ber thu a sawi. "Sorkar ringawt chuan hetiang hi tha takin a enkawl thei lo va, kohhranin hmangaihna nena a enkawl chi a ni. Synod hian rescue home tha tak tak an lo enkawl tawh thin a, chuvangin hei pawh hi an hlawhtlingpui ngei ka beisei takzet a ni," a ti. Kum 15 chhung atan inremna siam ni mah se, a aia rei pawh kalpui zui zel a beisei thu leh, sorkar pawhin a thlahthlam dawn loh thu a sawi bawk.

He centre Management Committee-ah Kolasib leh a chhehvel mite an tel chu thlamuanthlak a tih thu a sawi a. Mipui vantlang, kohhran leh tlawmngai pawlte nena thawhho theih dan ngaihtuah nasat a nih thu leh, he centre a lut te tana Skill Training pek chungchangah pawh LESDE Department te nen tanghova hmalak tha a tih  thu a sawi a ni.

Minister chuan, India ram pumah pawh a chawhrualin ruihhlo ti ah Mizoram kan sang ber chu pawi a tih thu a sawi a. "Mizoram hi Kristian kan nihna atanga min tluksawp tir tumin Setana hian min bei a ni. Kohhrante hi ruihhlo beihna tura ralthuam pawimawh ber an ni a, sorkar leh tlawmngai pawlte hi a thlawptu leh a dawttu an ni," a ti. Golden Triangle rama tel Myanmar nen km 500 chuang ramri kan intawm avangin ruihhlo tawlh a hluar hle tih sawiin, sorkar pawhin theih tawp a chhuah thu a sawi a. Supply reduction (ruihhlo man) mai a tawk tawh loh avangin Social Welfare Department chuan demand reduction (ruihhlo mamawhna tihhniam) lam an kalpui mek thu a sawi. Damdawi dawr (pharmacy) neituten an licence neih ang taka damdawi zuar tura chahin, dan in a phal chin bak damdawi emaw zuar an awm a nih chuan an licence tihtawp (cancel) sak an nih tur thu a sawi bawk.

Mizoram Synod Moderator Rev. John Raldosanga pawhin Pathian hnena hlan a a neih zawhin thuchah a sawi a. He hmun pual hian Synod chuan ngaihtuahna a seng nasa hle tih a sawi . "Mizoram Sorkarin chhanchhuah ngaite chhanchhuak tura Synod min ring zo hi kan lawm hle a. Min rin ang ngeiin Pathian rinchhan chungin hlawhtling taka kalpui turin theih tawp kan chhuah dawn a ni," a ti. De-addiction (ngawlvei enkawlna) piah lamah a enkawlzuina tur training buatsaih tum a  ni a, chu chu a hlawhtling a beisei a ni a ti. He Jordan Centre hi Synod-in rescue home a enkawl pathumna a nih dawn thu leh, heng bakah hian Mizorama home hrang hrangte tanpuina atan cheng nuai 80 lai pek chhuah a nih tawh thu a sawi. He hmun hi hlawhtling taka enkawl a nih theih nan a chhehvel kohhrante leh Pastor bialte nena tan tlan a pawimawh hle dawn tih sawiin, tawngtai leh thilpek hmanga rawngbawl hna thawk zel turin kohhran mi te a chah a ni.

He hunah hian Rev. Lalrinmawia, Director, Jordan Centre hnen atangin report ngaihthlak a ni a. Report-a a tarlan danin, Jordan Centre, Sethawn hi Mizoram Sorkar leh Mizoram Synod inremna (MoU) angin March 18, 2026 atang khan kum 15 chhung Synod-in a enkawl turin tihfel a ni. He hmun enkawl tur hian Jordan Centre Managing Committee siam a ni a, Chairman atan Rev. Dr. K. Lallawmzuala leh Director atan Rev. Lalrinmawia ruat an ni.

Centre hi thuang hnihin kalpui tur a ni a, Ngawlvei enkawlnaah (De-addiction) hian mi 70-80 awm theiin, a dam mekte training pekna (After care) ah hian mi 150 vel awm theihna tur ruahman a ni a; chuvangin addict centre mai ni lovin thil zirna (training centre) a ni tel dawn a ni. A awm man hi thla khatah Rs. 3,000/- a ni ang a, pe thei lote chu Synod-in a tumsak dawn a ni.

Naktuk, October ni 7 atangin admission hawn a ni ang a, October ni 20-ah luh tan a ni ang.

September ni 18, 2026 khan thawktuten hna rawn zawmin, an chenna tur quarters te pawh chei that a ni a. Electric lam harsatna phuhruk nan generator bun a ni a, Jio internet leh CCTV te pawh peih fel a ni tawh. Director chuan mipuite tawngtaipuina ngenin, a hmuna kal a tawngtai duh te tana hman theih tur guest house tha tak a awm thu a tarlang bawk a ni.

He hawnna inkhawmah hian Thingdawl Pastor Bial Zaipawl an zai a. Pu Lalchhungliana, Co-Ordinator, Synod Social Front chuan lawmthu sawina a neih hnuin Rev Lalbiakchhunga Pachuau in malsawmna in inkhawm hi a khar a ni.