Vawiin khan Social Welfare Minister Pu PC Lalthanliana chuan Ministry of Social Justice & Empowerment bultuma buatsaih tlawmngaipawl (NGO) te kaltlanga pianphunga rualbanlote, ruihhlo ngaite leh upate enkawl leh chhawmdawl tihchangtlun lehzual dan tur sawihona Workshop chu  Aizawl Club-ah a hawng.

Pu P C Lalthanliana chuan pianphunga rualbanlote enkawlna kawngah inpekna chu  pawimawh hle mahse thiamna  tel lo chuan tha thlawn senna mai a ni thei a, anmahni tan pawh thil thalo zawk a ni hial thei a ni, a ti a. Khawngaihtu leh ngaihsaktu nazawng tan enkawl hna a thawh ngawt theih loh va, anmahni tanpui tur chuan awmze nei zawka inbuatsaih leh inzirtir a tul a ni, a ti. Minister chuan ruihhlo ngaite enkawlna chungchangah  sorkar-in hma a lak mek thu sawiin Sethawna ruihhlo ngai enkawlna hmun pawh chei that mek a ni, a ti a. Tunhma a tih ngaihloh tunhnaia sorkar hmalakna in ruihhlo ngaite enkawlna Home leh pawl hrang hrang tanpuina sum a pek ve tak thu a tarlang bawk. Minister chuan upate hamthatna ngaihtuahtu pawl an tlem thu sawiin ruihhlo ngaite enkawlna midangin an ngaihtuah ang bawk hian pianphunga rualbanlote leh Upate  hmakhaw ngaihsaktu pawl rintlak leh thahnemngai tam zawk an la chhuah ngei a beisei thu a sawi a. Tanpui tlak, enfiah tlak leh chhenfakawm tlawmngaipawl tha ni chhunzawm zel turin Home leh Center hrang hrang enkawltu kalkhawmte a chah a ni.

Social Welfare Secretary Pi B Sairengpuii kaihhruai he workshop-ah hian Central lam atangin Pi Reena Garg Director(IFD) Ministry of Social Justice & Empowerment leh Dr. Ratnesh Kumar Director National Institute for the Orthopaedically Handicapped (NIOH) Kolkata te an tel a. NGO hrang hrang, Home leh Center hrang hrang enkawltute an kal tha hle.