Mizoram Social Defence & Rehabilitation Board (MSD&RB), Social Welfare Department hmalaknaa Mizoram De-addiction Centre hrang hrang 29 atanga ruihhlo ngaite enkawlna kawngah ramchhunga tha ber tia sawi TTK Hospital, Chennai-ah study tour-cum-training tura kalte chu nimin khan Aizawl an rawn thleng leh tawh a. Vawiin khan Social Minister Dr.K.Beichhua hovin Aijal Club Conference Hall-ah an study tour report ngaihthlakna leh training thlirletna hun hman a ni.

 

Vawiina meeting Social Welfare Joint Director Pi Vanlalpianpuii kaihhruaiah Minister Dr.K.Beichhua chuan thusawiin Mizoram sorkar chuan state chhunga De-addiction Centre te tihchangtluna tihhmasawn a pawimawhzia hriain a vawi khatna atan a huhova heng Centre enkawltute training turin a tir thei chu a lawmawm hle a ni a ti. Vawiina Mizo ram leh hnamin a mamawh ber chu kan tualzal nun himna (social security) a ni tiin Dr.K.Beichhua chuan hmasawnna eng ang pawh nei mahila, sum leh pai dinhmun pawh sang zel mahse khawtlang nunphung him tak tel lo chuan a ropui vak chuang dawn lo a ti. Hei hi Chief Minister pawhin a vei em em leh a ngaih pawimawh berte zinga mi a nih avangin sorkar chuan theihtawp a chhuah zel dawn a, hemi kawnga sorkar hmalaknate hlawhtling thei turin MKHC hnuaia kohhran awm zawng zawngte pawhin tawngtaipuiah a sawm nghal a ni. Tun dinhmunah Mizoram electoral roll-ah mipa aiin hmeichhia an tam zawk a, Board Exam result hrang hrangah hmeichhiate hming a langsar zawk tawh bakah, sorkar hna leh hna dang zawnnaah pawh mipa aiin hmeichhia an tam tawh zawk tlat hi ngaihtuahna a tikal thui hle a; ruihlo do chu hmingthat a har viau naa, ruihhlo ti lo tur leh a ti tawhte chhanchhuah hna thawk tura Pathianin palai ‘ambassador’ atan a ruatte an nih avangin an rawngbawl hlen zel turin a fuih a, sorkar pawhin Budget tharah hemi kawngah hnathawh chak lehzual theih nan sum dah turin hma a lak mek thu a sawi bawk. Social Welfare Department leh Excise & Narcotics Department a chang hi Pathian remruatna dik tak, mipuite tana a rawngbawlna tur kawng atana pek a ni tih a pawm thlap thu leh chu chuan amah pawh a tihlim hle thu a sawi bawk.

 

Mizoram chhunga De-Addiction Centre awmzat chu : Aizawl District-16, Lunglei District-6, Siaha District-2, Serchhip District-2, Mamit District-1, Kolasib District-2 leh Champhai District-4 a ni a. Mizoram sorkar enkawl lai hmun 2 a awm a, chung chu : 1). PISGAH Reformatory, Thingsulthliah leh 2). Reformation Centre, Champhai te an ni a, heng hmun 2 te hi Mizoram Social Defence & Rehabilitation Board (MSD&RB), Social Welfare Department hnuaia enkawl an ni. 


Ruihhlo leh a kaihhnawih inenkawlna lam zir turin hemi kawnga thawktute chu January ni 31, 2019 khan Pi K.Vanlalrawni, Secretary, Social Welfare Department chuan New Capital Complex, Khatla atangin a vailiam a, nimin February ni 13, 2019 khan Lengui Airport an lo thleng leh a ni. Training-a kalte hi vawiinah SWD Minister hovin thukhawmin an hlawkpuizia te ngaihthlak niin, hetiang training pawimawh tak dawng tura Mizoram pawnah hiah Mizoram sorkarin a tirchhuak chu lawmthu an sawi mawlh mawlh a ni.