Lunglei District PYD Conference vawi 47-na Zokhuma Memorial Field, Haulawng-a neih chu nimin 29.3.2015 (Pathianni) zan khan a tiak ta a. Palai inziaklut 1800 chuang awmna he inkhawmpui tiak zan hian Social Welfare Minister leh Bialtu MLA ni bawk Pu PC Lalthanliana chuan inkhawmpui hi a chhim.

Inkhawmpui palaite hmaah thusawiin Pu PC Lalthanliana chuan Haulawng khua chuan kum 2013 khan MTKP Inkhawmpui an lo dawl tawh a, a bialchhung khua Haulawng inkhawmpui lian thlen nana an duh hi a lawmawm hle a, a khua mite inpekna leh midangte tana an rawngbawl duhna thinlung a fakawm takzet a ni, a ti. Sum tam tak hmang lova Haulawng-in pandal mawi tak an siam thei chu chhuanawm a tih thu a sawi a. Sorkar leh kohhran hi inngaihsak tawna intichak tur an ni reng a, amaherawhchu a infin tur a ni lo. Tunlai khawvel hmasawn IT khawvel hi Kohhran thalai ten an chhiatpui loh a pawimawh a, chankanna khawvel hian a tha zawngin hruai mawlh thei se a duh thu a sawi bawk. Khawvel zau tak si, zim tak si ah hian dikna leh thianghlimna nena thiam taka nung turin Conference palaite a chah a ni.

Minister hian Pastor leh field evangelist inkhawmpui kal zawng zawngte inkhawm ip tur a pe a, Lunglei District PYD OB te note bu a pe theuh bawk.