2746/2025-2026

Lunglei, 2025 Pawltlak thla ni 20: Vawiin khan Social Welfare, Women and Child Development Minister Pi Lalrinpuii, Lunglei East bialtu MLA ni bawk hovin Lungleia MLA dang pathum – Lunglei North bialtu leh Lunglei High Powered Committee (HPC) Vice Chairman Pu V. Malsawmtluanga, Lunglei West bialtu Pu T. Lalhlimpuia leh Lunglei South bialtu Pu Lalramliana Papuia te chuan Lungleia home hrang hrang – Lunglei Home TNT, WADA Centre, Bethel Centre, Chhawmdawla In leh Rescue Centre bakah, Lunglei District Jail te an tlawh a, Krismas thilpek an hlan.

Minister leh MLA-te hian intiam ruala pawisa an thawh khawm cheng nuai li (₹4,00,000/-) chu he'ng home leh jail-ah te hian Krismas thilpek atan an sem a. Lunglei Home TNT-ah cheng nuai hnih hlanin, WADA Centre, Bethel Centre, Chhawmdawlna In, Rescue Centre leh District Jail-ahte cheng sing li ṭheuh an hlan thung.

He'ng home an tlawhnaah hian Minister Pi Lalrinpuii chuan a department enkawl Social Welfare, Women & Child Development hnuaiah home hrang hrang tihchangtlunna leh hmasawnna atan theih tawpin hma an la ṭhin tih sawiin, Lungleia home-te pawh sawrkarin an mamawhna zawnah a ngaihven reng thu a sawi a. Sawrkarin ruihhlo ngaite a buaipui nasat thu leh sawrkar, kohhran leh tlawmngai pawlte nen ṭang tlanga Hulhliap Short Stay buatsaih a nih thu sawiin, ruihhlo ngaite chu Synod Rescue Centre, Aizawlah ni 20 chhung enkawl a, ruihhlo an sim theih nan leh an taksa, rilru leh thlarau lam tan hma lakpui an nih thu te, thiam thil zirna (skill training) te nen vil zui a, eizawnpui tlak thiamna nei tam tak chher chhuah an nih tawh thu te a sawi a. Home hrang hrangah ṭhalai tam tak ruihhlo vanga enkawl ngaia an awm chu Mizoram tan hlohna nasa tak leh ram hmasawnna tiṭhuanawptu a nih thu sawiin, ṭhalaite chu ruihhlo leh zu ngawlveina bawih ata tal chhuak a, simna tak tak nen chhungkua, kohhran leh khawtlang tana innghahna tlaka home aṭanga chhuah tum turin a chah a. Ruihhlo sima home aṭanga an chhuah hunah an thiam thil hmanga ei zawng thei turin Bana Kaih Policy kal tlanga hma lakpui turin sawrkar leh department an inring reng tih sawiin, a ti tak tak leh tipuitling turte chu theih tawp chhuahpui an inhuam thu a sawi.

Home hrang hrang leh District Jail te hian an dinhmun tlangpui bakah, mamawh leh harsatna an neihte Minister leh MLA-te hnenah hian an lo thlen a. Minister leh MLA-te chuan an mamawh leh harsatnate chu a theih anga an bawhzuisak tur thu an sawi.

Minister leh MLA-te hian Lunglei Home TNT-a Ministry of Tribal Affairs kal tlanga Article 275(1) hnuaia kum upate awmna tur leh Multipurpose Community Centre tur sak mek chu an enfiah nghal a. SASCI sum cheng nuai 588.911 senga District Jail thuam ṭhat leh tihchangtlun hna thawh mek chu an enfiah bawk a. District Jail tihchangtlun hna thawh mekah hian Recreation Hall sak hna 50%, Separation Wall sak hna 90%, Women Ward tihzauh (vertical extension) hna 95% leh Security Duty Post pahnih sak hna 50% zawh tawh niin, Male Ward, Security Main Wall leh Visitors' Toilet sak hna te thawh tur a la ni bawk.

Lunglei Home TNT hian ruihhlo ngai, vohbik leh kum lama upa enkawl lai mi 758 neiin, WADA Centre-ah hian ruihhlo ngai enkawl lai mi 16 an awm a. Bethel Centre-in naupang enkawl lai 60 (mipa 34 leh hmeichhia 26) neiin, District Jail-ah hian tang 114 (mipa 98 leh hmeichhia 16) an awm mek a. Chhawmdawlna Inah ruihhlo ngai enkawl lai mi 85 (mipa 68 leh hmeichhia 17) awmin, Rescue Centre-ah ruihhlo ngai mi 56 (mipa 51 leh hmeichhia 5) enkawl mek an ni bawk.