1052/2024-2025

LUNGLEI; the 3rd July, 2024: Vawiin chhun dar 12:00 khan Social Welfare Department Minister Pi Lalrinpuii chuan Lunglei Observation Home leh Special Home Pukpui, Lunglei a tlawh.

Pu HV. Lalrinawma, Superintendent, Lunglei Observation Home leh Dr. Lalrempuii, Superintendent, Special Home leh thawktu dang ten Minister hi an lo dawngsawng a, Remand Home tia hriatlar thin, tuna “Observation Home” ni ta leh Special Home kalphung te bakah Juvenile Justice Act hnuaia naupang Kum tlinglo humsual daite nunkawng dik an zawh a, mahni kea ding thei tura an tanpui dan te leh Home an chhuahsan hnua follow up an neih dan te leh hmalakna an neih hrang hrang te report an pe a, Home mamawh hrang hrangte pawh Minister hnenah hian an lo thlen bawk.

He hunah hian Minister Pi Lalrinpuii chuan thusawiin, Mizorama chengte hi tlemte kan ni a, chuti chung chuan naupang humsual dai palh enkawltur kan nei ve reng mai a, chutiang naupang te enkawlna tur sawrkarin hmun kan nei hi a lawmawmin a vannei thlak hle a ni, a ti. Thawktute rilru hi naupang te rilru putzia-ah a lo langchhuak vat thin a, chuvangin thawktute pawh theihtawp chhuah a an rawngbawlna hlenchhuak ngei turin Minister chuan a fuih hlawm bawk.

He hunah hian Social Welfare Minister-hi Pu Lalramchuanzela, Member, Mizoram Youth Commission leh Executive Director, Mission Foundation Movement leh Pu K.Lalrinawma, Vice Chairman, Lunglei Municipal Council leh a thawhpui Councillor te bakah  ZPM Sub Hqrs Lunglei Elected OB leh  hruaitu dangten an tawiawm a ni.