2757/2025-2026

Lunglei, 2025 Pawltlak thla ni 22: Vawiin khan Mizoram sawrkara Social Welfare, Women and Child Development Minister Pi Lalrinpuii chuan Lunglei Convention Centre-ah upate dinhmun leh harsatna zir hona, "One day Workshop on Elderly Issues" hun a hmanpui.

He hun hi Regional Resource Training Centre (RRTC) for Senior Citizens, Mission Foundation Movement (MFM) buatsaih niin, Lunglei veng hrang hrang Mizo Upa Pawl (MUP) unit 24 aṭangin member 267-in an chhim a ni.

Social Welfare Minister Pi Lalrinpuii chuan upate chu ram leh khawtlang innghahna (backbone), hnam nunphung, hlutna leh finnate vawng nungtu leh ṭhangtharte hnena hlan chhawngtu an nih thu sawiin, Mission Foundation Movement-in upate zahawmna leh hriselna ngai pawimawha hma an lakna chu fakawm a tih thu a sawi a. Khawvel inthlak danglam zelah upate'n hriselna lama harsatna te, nun khawharna leh an dikna leh chanvo hriat tawk lohna avanga harsatna hrang hrangte an tawk ṭhin tih sawiin, chu'ng an harsatnate chu sut kianpui turin sawrkar leh khawtlang ṭang ruala hma lak leh inzirtir a ṭul thu a sawi a. Mizoram sawrkarin sawrkar laipui nen thawk hovin upate himna, hriselna leh zahawmna vawng nung turin hma a la reng tih sawiin, upate tana ruahmanna hrang hrang kalpui zingah sum leh paia upate ṭanpuina leh chhawmdawlna, National Social Assistance Programme (NSAP) hnuaiah upate'n thla tina pension an dawn theihna (Indira Gandhi National Old Age Pension Scheme) te; upate enkawlna leh an dikna humhalhna dan pawimawh tak, Maintenance and Welfare of Parents and Senior Citizens Act te; upate enkawlna hmun (Old Age Home) te kalpui a nih thu a sawi a. Upate sum leh paia ṭanpui chauh ni lovin, khawtlangah inthliar hranna awm lova hrisel tak leh hlim taka nun an hman theihna tura hma lak chu sawrkarin a tum ber a nih thu a sawi.

Health Minister Pi Lalrinpuii chuan upate tan damdawia inenkawl chauh ni lovin natna laka fihlim tura inven leh fimkhur te, rilru leh thlarau hriselna leh hlimna vawn ṭhat te chu a pawimawh thu sawiin, mahni hriselna dinhmun endik fo tur te, ei leh in hrisel chauh ei tur te, nunphung hrisel leh rilru lam hriselna leh hlimna ngai pawimawh tur leh taksa sawizawi ngai pawimawh tur te'n upate chu a chah a. Mizo zingah kum upa an pung zel leh upate ngaih pawimawhna pung zel chu lawmawm a tih thu sawiin, sawrkar pawhin upate tan theih tawpa hma a lak zel tur thu a sawi a. Kum tharah Lunglei, Saitual, Champhai leh Mamitah kum upate enkawl zirna (Geriatric Caregiver Course) hawn a ni dawn tih sawiin, upa enkawl lai nei mekte duhsak an nih tur thu a sawi.

MFM Project Manager Nl. Esther Lalṭhachawii'n hun kaihruaiin, Rev. F. Sangvela'n hunserh a hmang a. MFM Executive Director Pu Lalramchuanzela'n RRTC hmalakna hrang hrang report pein, MFM School of Nursing Principal Pi Christina Zothanpuii chuan "Health and Wellness" tih thupui hmangin upatea natna lo chhuak ṭhin leh a enkawl dan a zirtir a. MFM School of Nursing-a Tutor & Fitness Trainer Tv. C. Lalremsiama'n upate tana insawizawi pawimawhna zirtirin, in lama insawizawi dan a takin a zirtir bawk a. Laithangpuii College of Pharmacy-a Lecturer Nl. Lalrempuii'n upate tana damdawi ṭha leh a ei dan tur dik zirtirin, MFM Finance Manager Tv. Lalramenga'n lawm thu sawiin hun a khar.

RRTC for Senior Citizen hi India sawrkar Ministry of Social Justice & Empowerment hnuaia awm niin, MFM hi Implementing Agency a ni a. Mizoram, Assam, Arunachal Pradesh leh Meghalaya te an enkawl mek a ni.