1548/2024-2025

Aizawl, the 12th August, 2024: Mizoram EMRS Society leh Social Welfare & Tribal Affairs, Govt. of Mizoram buatsaih Eklavya Model Residential School (EMRS) hnuaia thawktu lak tharte pual Orientation Training, ni 5 (12-16 August, 2024) chhung awh tur chu vawiin chawhnu dar 2:30 khan Social Welfare & Tribal Affairs, Women & Child Development Minister Pi Lalrinpuii chuan khuallian niin SIRD Training Hall, Durtlangah a hawng.

Khuallian Social Welfare & Tribal Affairs, Women & Child Development Minister Pi Lalrinpuii chuan Eklavya Model Residential School, Mizorama hna thawk tura lak thar, India ram hmun hrang hrang atanga lokalte chu Mizoram EMRS Society-ah thinlung taka a lo lawm thu sawiin, an tana orientation training buatsaih a ni chu lawmawm tiin, hei hi bultanna tha leh chhinchhiah tlak tak a ni, a ti a. Eklavya Model Residential School chuan zirna tha leh changtlung zawk bakah khawtlangah intluktlanna thlen a tum tih sawiin, kalkhawmte chu hemi tiipuitling tura mi pawimawh takte an nih avangin inpumkhatna, mitin huapzo leh hmasawnna thil thar thlen tura theihtawp chhuah turin a fuih a; kan tum ber tur chu zirna chauh nilo, khawtlang tana chhawrnahawm mi tha chherchhuah a ni, a ti. Mizorama hna an thawh chhungin chonate hmasawnna atana hmang thiam tura chahin, Mizoram chu tawng, hnam ziarang leh tih dan phung hrang hrang awmna a nih avangin hengte hi pawm thiama inzirna leh hmasawn nana hmang thiam turin a chah a, hei hian zirna hmunhma duhawm leh zahawm a siam thin a ni a, ti bawk.

Mizoram EMRS Governing Body Chairman ni bawk Pi Lalrinpuii chuan EMRS thawktute chu zirna mai bakah nunkawnga midang fuih phur theitu hmanraw tangkai tak an nih theih thu sawiin, zirlaite tana entawntlak leh kaihruaitu nih tum turin a chah a. Orientation training kaltlanga an zir tur pawimawh tak takte chu zirtirna kawnga hmanraw tangkai tak tak an nih hlawm avangin ngun taka ngaithlaa a taka chhawr tangkai tum turin a chah a. Mizoram EMRS hmalaknaa tel tura lak thar zawng zawngte chu thinlung taka lawmthu hrilhin, zirna, khawtlang rawngbawlna leh tribal-te tihhmasawnna tura an inpekna chu a ngaihhlutawm mai bakah tihmakmawh tak a ni, a ti a. Eklavya Model Residential School chu zirna kawnga beiseina thar leh hmasawnna a nih ngei theih nana tanlakpuiah a sawm a, an kalzelna turah duhsakna a hlan nghal bawk.

He hun hi Social Welfare & Tribal Affairs Director Dr. Lalhriatzuali Ralte, IAS, CEO, Mizoram EMRS Society chuan kaihruaiin kalkhawmte lawmna thu a sawi a, inhmelhriattirna hun hman a ni bawk.

Orientation Training-ah hian Mizorama EMRS School 11; Lunglei, Serchhip, Ngopa, Chawngte, Tuipang, Lawngtlai, Tlangnuam, Tlungvel, Niawhtlang, Bilkhawthlir leh Zawlnuam hnuaia thawktu lak thar teaching & non-teaching staff, Post Graduation Teachers (PGTs), Trained Graduate Teachers (TGTs), Librarian, Account leh Junior Secretariat Assistant (JSA), an vaiin mi 42 te an tel a ni.