1551/2024-2025

Aizawl, the 12th August, 2024: Social Welfare & Tribal Affairs, Women & Child Development Minister Pi Lalrinpuii chuan vawiin tlai dar 4:00 khan Middle School Veng, Zemabawk-ah Mizoram Upa Pawl Multi-Service Centre sakna tur lungphum a phum. Minister hi Social Welfare & Tribal Affairs Director Dr. Lalhriatzuali Ralte, IAS chuan a tawiawm a ni. 

Social Welfare & Tribal Affairs, Women & Child Development Minister Pi Lalrinpuii chuan MUP member-te chu Mizo mipuite timawitu leh zahawma siamtu an nih thu sawiin, aia upate zah nachang hriat thar leh a tul thu a sawi a. Sawrkar laipuiin kum upate a ngaihpawimawh thu leh hamthatna hrang hrang a siam sak thu sawiin, District tinah tar enkawlna in Old Age Home siam tum a nih thu leh Zemabawk MUP Multi-Service Centre sak mek kiangah Old Age Home din tura ruhmanna neih a nih thu a sawi a. MUP te chu mamawh leh harsatna an neihte Department hnena thlen hreh lo tura chahin, rem tak leh inhne tha taka thawhho zel a nih theih nan an tawiawmna leh thlawpna a ngen a. MUP Multi-Service Centre tha tak sak puitlin a nih theih nan duhsakna a hlan nghal bawk. 

Thusawitu dang Social Welfare & Tribal Affairs Director Pi Lalhriatzuali Ralte chuan MUP Gen. Hqrs. leh Zemabawk khawtlang hruaitute hmalaknaa MUP Multi-Service Centre sakna tur lungphum phum fel a ni chu a lawmpui thu a sawi a. MUP Multi-Service Centre chu Sawrkar laipui Ministry of Tribal Affairs hnuaia Article 275 kaltlanga sak tura ruahmanna siam a nih thu sawiin, hemi hnuaiah hian tribal-te hamthatna tur scheme hrang hrangte pawh thawh thin a ni, a ti a. Kalkhawmte chu project hlawhtlin nana theihtawp chhuahpuiah a sawm a ni. 

Hemi puala Middle School Veng Welfare House, Zemabawk West-a hun hman hi MUP Gen. Hqrs. President Pu Nghaklianmawia chuan kaihruaiin Pu Lalbiakmawia Khiangte, Vice President-in hunserh a hmang a. Er. Lalthankima, AE, Social Welfare & Tribal Affairs, Women & Child Development-in technical report a pe a. Khawtlang hruaitute hnen atangin thusawi ngaihthlak a ni a. Pu K. Thanmawia, Gen. Secretary, MUP Gen. Hqrs. in lawmthu sawiin hun hman a khar a ni. 

MUP Multi-Service Centre, Zemabawk hi Sawrkar laipui Ministry of Tribal Affairs hnuaia Article 275 sum cheng nuai 290 senga sak tura ruahman niin, hemi atang hian financial year 2023-2024 ah cheng nuai 100 hmuh tawh a ni.