1259/2024-2025

Aizawl, the 22nd July, 2024: Vawiin chawhnu dar 1:00 khan Women & Child Development leh Environment, Forest and Climate Change Department buatsaihin Sakawrhmuituai Tlang, Sihphirah Nu pual thing pakhat phun 'Ek Ped Ma Ka Naam and Plant4Mother Campaign' neih a ni a. He hun hi Social Welfare, Tribal Affairs, Women & Child Development Minister Pi Lalrinpuii chuan hmanpuiin a hovin thingphun hnatlang neih a ni.

He hun hmanpuitu Social Welfare, Tribal Affairs, Women & Child Development Minister Pi Lalrinpuii chuan nute puala thing phun campaign 'Ek Per Ma Ke Naam and Plant4Mother' buatsaihtu leh hemi puala kalkhawmte hmalakna fakawm tiin, he campaign hi tunlai khawvel sik leh sa inthlak danglam zel dolet kawnga hmalakna pawimawh tak a ni a, ramngaw chereu zel avanga harsatna a thlen loh nan thingphun kan uar deuh deuh a pawimawh a, hei hi kan tu leh fate tana kan mawhphurhna leh hmalakna tur a ni, a ti a. Ek Ped Ma Ke Naam and Plant4Mother Campaign chuan thingphun uar kawngah rah tha a chhuah ngei a beisei thu sawiin, vawiina hun hmanna Sakawrhmuituai Tlang chu Swadesh Darshan kaltlanga cheithat tum a nih thu a sawi bawk.

Pi Lalrinpuii chuan thing leh maute chu boruak tha min petu an nih mai bakah tunlai khawvela kan buaina lian ber boruak lum chho zel venna atana pawimawh ber an nih thu tarlangin, heng bakah hian leilung luangral tur vengtu tha tak a nih thu leh khuarel chhiatna tam tak laka min veng theitu a ni, a ti a. Minister chuan he hun hman ruala pawimawh leh mamawh ni a lang chu mipuite thinlungah thingphun pawimawhna nghet taka tuh a nih thu sawiin, hemi tur hian mithahnem ngaite bakah sawrkar leh tlawmngai pawlte kan tanrual a tul a ni, a ti a. Vawiina thing phunte chu kan tuchhuan lo la awm zel turte tana thilpek theih hlu ber a ni tih hriaa tuna kan thing neih sate humhalh chung zela thingphun uar sauh sauh turin kalkhawmte a sawm bawk.

He hun kaihruaitu Pi Lalzarmawii, IAS, Commissioner & Secretary, Social Welfare, Tribal Affairs, Women & Child Development Department chuan Sawrkar laipui Ministry of Environment, Forest & Climate Change bultumin thingphun beihpui 'Ek Ped Ma Ke Naam and Plant4Mother' tih thupui hmanga neih mek a nih thu leh hemi behchhan hian Ministry of Women & Child Development Department pawhin hma a lak thu a tarlang a. Global warming avangin sik leh sa danglam nasat tawh thu sawiin, India rama sik leh sa nuam bera ngaih Mizoramah thal a lo nih chuan India ram hmun dangte ang bawkin a lum tawh hle a ni, a ti a. Khawvel nuam zawk kan neih theih nan thingphun uar deuh deuh a pawimawh thu leh ramngaw humhalh a tul takzet thu a sawi a. Mizoram chhunga Anganwadi Centre tinah pawh thingphun tura hmalak chhoh mek a nih thu sawiin, kumin September chhung hian Anganwadi Centre tinah thing tiak pakhat tal phun hman vek tum a nih thu a sawi bawk.

Vawiin hun hmanah hian Pu Lalnunsanga Khawlhring, IFS, DFO Aizawl & CF, Northern Circle hnen atangin thusawi ngaihthlak a ni a. Pi Zoramthangi Chhangte, Director, Women & Child Development-in lawmthu sawiin hun hman a khar a ni. 

He hunah hian Pi C. Lalchhandami, Chairperson, Mizoram State Commission for Women, Sihphir khawtlang hruaitute leh Department thawktute an tel a, Ek Ped Ma Ka Naam and Plant4Mother Campaign pualin thing tiak 50 an phun a ni.