544/2026-2027

Dated Aizawl, the 15th May, 2026: Vawiin khan Social Welfare, Woman and Child Development Minister Pi Lalrinpuii chuan a pisaah hmeichhia leh naupang te himna atana Panic Button Passenger phur motor zawng zawnga vuah chu mipui nawlpui ten an hriatthiam theihna tur video, Mizoram State Commission For Protection of Child Rights leh Women & Child Development te buatsaih chu a tlangzarh.

Minister chuan Vehicle Location Tracking System Project lo chhuah dan sawiin, Nirbhaya Case avanga sawrkar laipuiin hmeichhia leh naupangte himna atana hmalakna a nih thu leh, sawrkar laipui chuan hemi lamah hian tha pawh a seng nasa em em tih a sawi a. Mizoram pawh Christian ram ni siin POCSO Case sang em em te, woman helpline in phone call an dawng tam em em reng chu a pawi a tih thu sawiin, hmeichhia leh naupang te himna atana hetiang ang hmalakna a awm hi lawmawm a tih thu a tarlang a. Mizoram sawrkar hnuaia thawktu hrang hrang Women and child development te, Transport department leh Mizoram State Commission for Protection of Child Rights te tangho a, hmalakna pawimawh tak a awm chho ta chu lawmawm a tih thu a sawi a. Emergency Button Monitoring Center-te leh Response Team-te, Police lam te inpekna chu lawmawm tiin, Panic Button chu mi tam thei ang berin an lo hmelhriat a, a mamawhtu leh hmang tangkai tur ten a hun taka an hman tangkai theuh theih nana promotional video thehdarh kawngah mi zawng zawng theihtawp chhuah theuh turin a sawm a ni.

Transport Department Director Er. Pu R.Lalrammawia chuan Vehicle Location Tracking System (VLTS) chu a sawifiah a. VLTS hi Sawrkar laipuia Ministry of Road Transport and Highways in October 25, 2018 a order a chhuah zulzui a hmalakna niin, October 2022 atang khan Mizoram sawrkar pawhin hma a lak tan thu a sawi a. Command and Control Center pawh September ni 15, 2023-ah hawn a lo ni tawh tih tarlangin, Ni 22 August 2023 leh September 23, 2024 khan notitication chhuah a ni. Passenger phur chi motor reng reng Taxi, Maxi cab, Bus leh Rental-ah te VLT khawl vuah lo leh tinung lo chuan Motor Registration a tihtheih tawh dawn lo a. Motor hluiah pawh, January ni 1, 2019 hnua lei ho chu order chhuah atanga thla 12 chhungin VLT Device an vuah lo emaw, an tinung lo emaw a nih chuan re-registration/permit issuance/fitment a renew theih tawh dawn loh. Auto – Rickshaw leh 2-Wheeler Taxi te erawh chu hei hian a huam ve lo a ni. Tunah hian Mizoram chhungah Vehicle Location tracking Device activate passenger phur motor hi 2,284 a awm mek thu a sawi a ni.

Video tlangzarhnaah hian Women and Child Development Director, Pi Zoramthangi Chhangte leh Commissioner & Secretary, Pi Lalzarmawii te pawhin thu sawiin, Mizoram tana rahbi pawimawh tak a nih thu leh hmalakna chu tha an tih thu an sawi bawk a ni.