67/2026-2027

Aizawl, 8th April, 2026 : Vawiin ni khan Social Welfare, Women & Child Development Department leh Regional Resource & Training Centre for Senior Citizen ṭangkawp buatsaihin Aijal Club-ah Maintenance & Welfare of Parents & Senior Citizens Act, chungchang zirhona (training) neih a ni a. Nu leh pa leh upaten dan hnuaia dikna chanvo an neih leh hamthatna an hmuh theihte zirho a ni.

Pi Zonunthari, Joint Secretary, Social Welfare, Women & Child Development Department in program hi a kaihruai a, Pi Lalrinhluii Sailo, OSD & Nodal Officer, Senior Citizens in keynote address a sawi a, Pu Lalbiakmawia Khiangte, Vice President, MUP General Headquarter chuan thu sawiin Mizoram a kum upate dinhmun tarlangin he dan a lo awm hi a lawmawm thu te a sawi a, Pu Lalbiaksanga, Elderline Programme Manager chuan Elderline chungchang sawiin kum upa ṭanpui ngai chuan phone number 14567 ah an rawn call chuan an lo ṭanpui theih reng thu a sawi a. Pu T.Lalnunsiama, Advocate chuan zirtirna a pe a ni.

Training hi Maintenance & Welfare of Parents & Senior Citizen Act 2007 dan in a phut angin, dan kengkawh tur a din Appellate leh Maintenance Tribunals member, District hrang hrang aṭangin D.C, S.P, SDPO leh thawktu dang hemi kaihhnawih hrang hrangte koh khawm an ni a, MUP, MHIP, CYMA, MKHC leh NGO dangte sawm an nih bakah department officials leh staff te an tel bawk.

He dan hnuaiah hian upa kum 60 chunglam enkawltu neilo te chu an fate emaw fa neilo chu an chhungte emaw an ro khawmtu in an enkawl tur ani a. He dan hmang hian fa ten an enkawl loh nu emaw pa te/chhungte/rokhawmtu chu action lak sak theih an ni a, a enkawl duhlo tu an fa te/chhungte/rokhawm tu chu thla khata cheng 10000/- thleng an nu leh pa te/pi leh Pu/chhungte/ro an khawm sak te chu in enkawl na tur pek tir theih a ni. Tin, inlaichinna awmlo mahse, rokhawm saktu in a rokhawm saka kha a enkawl duh leh siloh chuan, kha ro kha lak let sak theih a ni. District tinah Tribunal hi din tur a ni a, hetah hian complaint hi thehluh theih a ni.

Chairperson Pi Zonunthari chuan he dan hi upa te dikna chanvo humhimna leh nuamsa taka an damchhung hun an chhiar theih nan a duan anih angin, chairperson chuan upa te zah a, an dikna chanvo humhalh leh humhimna lama ke pen theuh turin training a kal zawng zawng te leh Mizoram mipuite a chah a, midangte pawh in hrilh chhawng zel turin a chah bawk a ni.