2228/2026-2027

Dated Aizawl, the 16 September 2026: Vawiin khan Social Welfare, Women & Child Development Department changtu Minister Pi Lalrinpuii chuan, P&PI Conference Hall, (RDB), Aizawl-ah, National Commission for Women (NCW) leh Mizoram State Commission for Women (MSCW) ṭangkawp buatsaih, “ kumin-a siam that "The Mizo Marriage and Inheritance of Property Act, 2014” tih thupui hmanga Consultation Meeting chu khuallian niin a hmanpui a. He hunah hian Mizo Inneih leh Rokhawmna Dan kaihhnawiha rawtna hrang hrangte kalkhawmte atangin ngaihthlak a ni.

Consultation Meeting hawnnaah hian khuallian, SW, W&CD Department changtu Minister Pi Lalrinpuii chuan thusawiin, Women Commission-in Mizo Inneih leh Rokhawmna Dan zirhona hun a buatsaih chu lawmawm a tih thu a sawi a. The Mizo Marriage & Inheritance of Property Act 2014,2026-a siam that (amend) tak chu Mizo mipui (a bik takin hmeichhiate) dinhmun nasa taka nghawng thei Dan pawimawh tak a ni tih sawiin, Sawrkar pawhin hmeichhiate hamthatna, an dikna leh chanvo humhalhsakte chu a ngaihpawimawh berte zing a mi a ni a ti a. Hemi kaihhnawihah hian Mizoram State Commission for Women chuan kum 2014 ata vawiin thlengin case 545 zet a dawn tawh bakah, chung zinga case 535 lai chu a ching fel tawh tih sawiin, MSCW chuan theihtawp chhuaha Mizo hmeichhiate dinhmun kaihhnawih Dante ennawn chu a mawhphurhna pawimawh tak a ni tih a sawi a. Mizoram sawrkar chuan hmeichhiate dinhmun ngaipawimawh tak chungin Dan siam thatah pawh Sumchhuaha nupa an inthenin Hmeichhia ten nupa thawhchhuah atanga zaa sawmnga thlengin an hauh ve theihna turte an telh tih a sawi a. Dan zirhona chuan rah tha tak a chhuah bakah mipui vantlang thinlungah Dan hriat chian zualna leh awmze nei zawka hmannaahte kawngro a sut ngei a beisei tih a sawi bawk.

Vawiina Consultation Meeting hi hun thuma then niin,Inneih, Inthen leh Rokhawm chungchangte chu a mal mala zir hovin, kalkhawmte atanga rawtna awm angte ngaihthlak a ni a. Heng rawtna hrang hrang lutte hi MSCW chuan thlifimin Sawrkarah rawtna a theh lut leh dawn a ni.

Meeting-ah hian tlawmngai pawl leh kohhran hrang hrang hruaitute bakah mi thiam sawm bikte an tel a. Chairman Pi C. Zodinpuii, Chairperson, Mizoram State Commission for Women chuan Meeting hi kaihruaiin thupui a sawizau a. Technical Session-in chhunzawmin, session hi Pu T. Lalnunsiama, Legal Cell Member, Mizoram Commission for Women chuan a kaihruai a. Chairman chuan lawmthu sawiin programme hi a khar a ni.