Vawiin khan Rural Development leh UD&PA Department te tangkawpin ramchhunga mipuite hriatchian lehzual nana ‘Socio-Economic & Caste Census 2011’ a kalpui mek zirchianna training chu Agriculture Conference Hall-ah neih a ni a. Addl. Secretary, RD & GAD Pu V. Lalremthanga’n a hmanpui a, training hi UD&PA Director Pu K. Lalthawmmawia’n a kaihruai a ni.
Addl. Secretary Pu V. Lalremthanga chuan nikum atanga sorkar laipuiin rampuma a kalpui tan tawh, BPL Census tia hriat lar bawk, he chhiarpui hi uluk taka tih a ngaih thu a sawi a. Training hote chu huaisen leh dik taka thil ti tur leh chhawmdawl ngai leh paih ngai te paih hreh lo tura chahin hei hian Mizoram tan rah tha a chhuah dawn a ni, a ti a. Training kaihruaitu UD&PA Director Pu K.Lalthawmmawia chuan he chhiarpui thil tum ber tarlangin ramchhung mipui mimir chiang lehzuala an dinhmun hriat theihna tur leh khaichhuah ngaite khaichhuah chu a tum ber a ni, a ti.
Sorkar laipui chuan ramchhung mipui zat leh chhungkaw dinhmun dik tak chian nan Socio Economic & Caste Census 2011 (SECC-2011) neih turin a ruahman a. SECC-2011 hi India rampuma neih tur niin senso tur pawh sorkar laipui tum tur a ni. He chhiarpui hi June 2011-a tanin state zawng zawngte chu December 2011-ah zawh fel vek tura tih a ni a. Mizoram-ah hian 10 October 2011 atanga tanin 23 November 2011-ah zawhfel tura ruahman a ni.
SECC-2011 ah hian Census 2011-a Charge Area, Superviosry Circle leh Enumeration Block te rin nghal vek tir a ni a. Directorate of Census Operations, Aizawl chu a tul ang anga lo tanpui tur leh kawhhmuh tura tih a ni bawk. Mizoram Urban Area bikah hian Enumeration Block-999 awmin, Charge Area-39 leh Supervisory Circle-168 a awm a. Charge Officer 39 leh Master Trainer 25 ruatfel tawh an ni. Zone hnih (2) - ah thenin Aizawl Zone ten vawiin leh naktuk ah training hi an nei ang a, Lunglei Zone ten 27 - 28 Sepetember hian DC’s Circuit House Conference Hall-ah training an nei ve thung ang.
Vawiina training petu te hi National Trainers leh Master Trainers Facilitators an ni a, August thla khan NIRD, Hyderabad-ah training chhuak an ni.
