Information Technology lama Mizoram hmasawnna tur rahbi pawimawh, Software Technology Park of India (STPI) dinna tur inremna thuthlung Memorandum of Understanding chu vawiin khan Information and Communication Technology Minister Pu Zodintluanga pisa-ah Mizoram sorkar, Mizoram University leh Ministry of Information Technology, Govt. of India te chuan an ziak fel.

Software Technology Park of India din a nih thuai theih nan hian Union Minister Sachin Pilot-a’n Mizoram a lo tlawh tum khan ICT Minister Pu Zodintluanga chuan thu alo thlen tawh a. Hemi tum hian Pu Sachin Pilot chuan a rang thei ang bera tih hlawhtlin a nih tur thu a lo sawi tawh nghe nghe. STPI dinna tur hian hma chak taka lak niin a sakna hmun tur dap a ni a. Mizoram University Campus chhunga din a nih theih nan University thuneitute Mizoram sorkar chuan a dawr a, remchang takin Mizoram hmasawnna tur a nih beiseiin MZU Campus chhungah STPI dinna tur ram 5 acres an lo pe thei a ni.

Vawiina MoU ziahna ah hian ICT Minister Pu Zodintluanga chuan Mizo thalai te chu Information Technology-ah nasa takin an thang tiin saptawng hriat nuam taka lam thei Mizo thalai tam takin IT kaihhnawih eizawnna Call Centre-ah te India ram khawpui hrang hrangah an thawk mek a, STPI kaltlanga BPO Mizoram chhungah ngei siam a nih hunah thalai tam tak tan eizawnna a siamsak dawn a ni, a ti. STPI-ah hian IT kaihhnawiha sumdawng duh te tanpuitu tur Incubation Centre siam a nih dawn avangin Minister chuan IT lama sumdawnna kawngah thalaite eizawnna kawng zau zawkin hawntu a nih ngei a beisei thu a sawi a. STPI hi Internet Service Provider an nih nghal dawn bawk avangin Internet Connectivity chung changah pawh hmasawnna a awm dawn tiin Pu Zodintluanga chuan hmun dang kal ngai lovin Mizo thalai lehkhathiam ten Call Centre mai bakah Medical Transcription leh Software lama sumdawnna te pawh Mizoram atang ngeiin an thawk thei tawh dawn a ni, a ti bawk.

Vawiin a STPI dinna tur MoU ziahna ah hian Mizoram State sorkar aiawh in ICT Principal Secretary Pu SS Garbyal, Govt. of India aiawhin STPI New Delhi Director General Dr Omkar Rai leh Mizoram University aiawhin MZU Registrar Prof. Thangchungnunga ten hming an sign a ni.