Vawiin chawhnu dar 1.00 khan Information & Communication Technology (ICT) Minister Pu Zodintluanga pisaah Mizoram-a Software Technology Park of India (STPI) din tura inbuatsaihna kal mek chungchang sawiho a ni a; ICT Department aiawhin Principal Secretary Pu S.S. Garbyal IFS leh officer dangte an tel a ni.

STPI hi Department of Information Technology, Ministry of communication hnuaia mahnia inrelbawl hranga awm a ni a; a hna bulpui ber chu ram pawna thawnchhuah tlak computer software duan chhuah leh tihphuisui a ni a; hetiang lama mithiam bikte leh eizawnna atana hmangte chuan STPI hi an chhawr tangkai em em a ni. STPI dinna tur hian Central sawrkar chuan an inbunna tur building 3000 sq ft leh ram acre 3 an mamawh chu Mizoram sawrkar hnenah a dil a; Mizoram sawrkar chuan tuna an inbun lailawkna turin Ch. Chhunga Terminal Building, Thuampui, Aizawl-ah building 3700 sq ft a ruahmansak tawh a; hmun nghet an kulhna turin Mizoram University campus, Tanhril-ah ram acre 5 a ruahmansak bawk a ni. Mizoram University campus chhunga an ram luah hawh tur hi kum 69 atan a ni dawn a; hemi chungchangah hian Central Sawrkar leh Mizoram Sawrkar bakah Mizoram University te chuan inremna thuthlung an ziak fel thuai dawn a ni. Tunah hian SPTI atana hman tur khawl leh bungruaten Aizawl a lo thleng tan mek a, an hmunhma turte hi 12.3.2012 (Thawhtanni) khian ICT Minister Pu Zodintluanga chuan a hmunah a enpui ang.