Vawiin khan Champhai District chhung Ngopa, Khawzawl, ‘S’ Khawbung leh Champhai-ah te Soil & Water Conservation Department hnuaia NLUP hamthatna dawngtute hnenah tanpuina sum sem a niin, Champhai ah chuan 1 & PR Auditorium ah he semna hun hi hman a ni.

Champhai District chhunga Hmunphiah leh Coffee hamthatna dawngtu chhungkaw 240 zinga chhungkaw 78chu Champhai ah hian sem a ni a, he hun hi Pu R. Lalramliana, District Soil & Water Conservation Officer in kaihruaiin Champhai Add. DC. Pu Zoengsanga’n a hmanpui.

Pu Zoengsanga chuan thusawiin Mizoram hi state pachhia kan nih avangin Sawrkar laipui puihbawmna leh tanpuina dawng mek kan ni a, chutih laia chhungkaw harsa zawkten eizawnna ngelnghet an neihna tura Mizoram sawrkar Flagship programme NLUP kalpui mek hi a lawmawm in kan vannei takzet a, he hamthatna dawngtu chhungkaw tinten dikna leh rinawmna hmachhuanin dinchhuahpui ngei tura hma lak hi kan mawhphurhna ani ati.

Champhai District chhungah NLUP 1st Phase ah chhungkua 5961 in dawngin 2nd Phase ah chhungkua 6206 in an dawng leh dawn a, Hmunphiah leh Coffee thlangtu 1st Phase ah chhungkaw 365 awmin 2nd Phase ah chhungkaw 240 an awm dawn bawk a, Dawngdah taka heng hamthatna hmangtute leh tumruhna nena thawkte dinhmun hi chu hun reiloteah a takin a lo lang dawn a , holam taka heng hamthatna dawngtuten a petu sawrkar emaw sawrkar department emaw an dem let tur a nih loh thu Pu Zoengsang chuan a tarlang bawk.

Soil & Water Conservation Department hnuaia NLUP hamthatna dawngtute hian 1st Phase ah Rs.88000/-dawngin 2nd Phase ah pawh hetiang bawk hi an dawng leh dawn a. Vawiin ni ah hian Rs.22000/- theuh hamthatna pek an niin, he hunah hian zawhna leh chhanna hun hman a nih bakah Hmunphiah leh Coffee chin dan leh enkawl dan S&WC officer ten zirtirna an pe nghal bawk.