Chief Minister Pu Lal Thanhawla chuan sorkar-in hmasawnna hna a thawhte hi mipui tan a ni a, mipui ta a nih bawk avangin neitu rilru pu chunga enkawl hi mitin mawh a ni a ti. He thu hi vawiina Serchhip Khawtetlang-a Lalsawmliani leh Lalthanchunga Football Tournament vawi 12-na Final khelhna a hmanpuina a a sawi a ni.

Chief Minister chuan a nu Lalsawmliani leh a nau Lalthanchunga te hriatrengna football tournament Serchhip District Football Association (SDFA) in vawi 12 ngawt an buatsaih chho thei chu a lawmawm hle a ni a ti a. Serchhip hi hmun laili a awm a ni a, Zoram khawi hmun atang pawhin pan a awlsam avangin inkhelhna hmun tha tak awm se tiin, chumi denchhen chuan sports complex te, auditorium leh indoor stadium te din mek a ni a ti a.Hengte hi Mizoram pumin kan chhawr theih tura ruahman a ni a ti.

Mizo thalai infiammite hi tha tur leh felfai tak ni tura kan duh chuan keimahni a sports administrator-te hi chutianga awm a, entawn tlaka kan awm hmasak angai a ni a ti a. Olympic lo awm leh tur, kum 2016 a Mizo fate discipline 6 ah tal kan chhuah ve ngei theih nan tun atang hian Sports Minister hmalaknain inbuatsaihna a kal chho mek a ni a ti a. Thalai te chu ei leh inah fimkhur a, sim ngai kan neihte kan sim tur a ni a ti a. Kan infiamnaah theihtawp kan chhuah thin tur a ni tiin, mipui entute hmuhnawm tih tura infiam tur kan ni a ti a, englai pawha sportsman spirit hi kan neih a tul a ni a ti.

Chief Minister chuan Mizo ten kan mamawh ber chu Lal Isua anih laiin, rilru insiam thatna, moral reformation a ni a ti a. Kan intehna turte pawh kan hlawh leh kan thawhchhuah a inphu em tih te leh kan sum lakluh leh kan khawsakziate a inphu reng em tihte kan inbihchiang thin tur a ni a ti a. Keini politiciante pawh kan dinhmunah ruling kan nih lai leh kan nih hma te a inthlau viau em tih te kan inteh tur a ni a ti. Corruption chungchangah a zung chu kan phawi chho mek zel a, a phoro lamah pawh hna atanga ban leh pension tir te an awm a, jail tan tira hrem tur chuan court lam hna a ni a ti.

L&L Football Tournament hi September ni 4 atang khan khelh tan a ni a, an vaiin team 23 an chhuak a, chung zingah chuan Aizawl atangin team 6 leh Lawngtlai leh Thenzawl atangin team 1 ve ve an tel a ni.Vawiina final khelte hi AFC Kulikawn leh Mizoram Police te an ni a, AFC Kulikawn hian 5-2 a an khingpui hi hnehin Championship Trophy leh pawisa fai Rs.70,000/- an dawng a, Mizoram Police hian Trophy leh Rs.35,000/- an dawng bawk a ni. Fair play lawmman siam a ni bawk.

Chief Minister hi Pu P.C.Lalthanliana, Minister of Stae for Social Welfare etc leh MFA hruaitu thenkhat ten an tawi awm a. Final khelh inkhawm hi Pu Zomuana Hnamte, SDFA President in a kaihruai a ni.