Ethics Committee Chairman Rev C.Rosiama chuan ' Sorkar thawhpuitu tur kan ni a, sorkar hnuaia department ang chu kan nilo' a ti. He thu hi vawiina New Secretariat Conference Hall-a Mizoram MLA zawng zawng an kohkhawma a thusawi a ni. Mizoram aiawh MP pahnihte sawmbik an nih angin Rajya Sabha MP a tel bawk.

Ethics Committee Chairman chuan sorkarin ethics committee member tura an ruatna te chu theihtawp chhuah a, lungrual taka thawk tura sorkar ruatna chu an pawm thu a sawi a. Sorkar department ang nilo, dik tak leh huaisen taka sorkara thurawn petu tur, thil fello leh diklo awm tur laka sorkar venpuitu, sorkar rintlak leh belhchiandawl neih dan kawng kawhhmuhtu tur an nih thu a sawi a. Tute hawlfung mai nilova, corruption awm thei vengtu ni a, a that lohzia mitin thinlunga tuh chu an thil tum a ni ang a ti.

Chief Minister Pu Lal Thanhawla chuan Ethics Committee in inkawmhona an rawt chu a finthlak hle a ni a ti a. A sorkar chuan sorkar tha, dik leh fel, corruption awm lohna leh langtlang sorkar awm tir hi an duhdan a ni tiin, zalenna zau tak nen terms of reference te pawh anmahni ngeiin duang se tih chu an duhdan anih thu a sawi a. Amaherawhchu sorkarin a enkawl loh theih loh anih avangin an kal danah ngaihtuah thiam harsa a tih thu a sawi a. Tuna an hnathawh dan tur kaihruaitu terms of reference pawh siam that ngai awm leh paih ngai awm ang te chu a tul ang zela hmalak a ni ang a ti a. A tul chuan CBI emaw ACB emaw ang te pawhin hna an thawk thei a ni a ti. Eptu member te hlei hlei hian hmang tangkai hle se a duhthu a sawi bawk a ni.

Inkawmnaah hian thusawi tura ruat zinga Pu R.Romawia, Speaker chuan MLA te inkaihhruaina bung leh chang, leh ethics committee Assembly in a neih ve thu a sawi a. Dr. R. Lalthangliana chuan member atan mipui rinkai sorkarin a ruat chu lawmawm a tihthu sawi a. An hna chu hautak deuh tur a ni tiin, sorkar hlimthla chiang taka lan theihna tur a ti a. Mipuite sawihlawh thilah te bengkhawn thin turin a chah a ni. Pu Lalduhawma pawhin thusawiin, ethics committee chu awm reng tura beisei a nih avangin tute pawhin chhawm reng theih tura siam a tul thu a sawi a. Chuvangin terms of reference thenkhat paih ngai lai a tih te a sawilang bawk a ni.

Chairman in a sawm angin Pu Lalhmingliana, MP (Rajya Sabha) chuan ethics committee chu politics piahlam atanga hna thawk tur an nih avangin tawngtaipui an ngai hle dawn a ni a ti a. Mizoram thar min hmuh tir theitu anih ngei a beisei thu a sawi bawk a ni.

Inkawmhonaah hian ethics committee secretary Maj Dr. J.Thanruma'n report leh introduction neihna hun a hmang a, Pu H.Raltawna, IAS( Rtd), ethics committee member in a kaihhruai a, Aizawla Legislators awm te chu an kal kim vek a ni. Lok Sabha MP Pu C.L.Ruala erawh remchan lohna avangin a tel thei lo bawk.