Vawiin khan Chief Secretary Pu Vanhela Pachuau, IAS hovin Minister of Panchayati Raj Additional Secretary Dr. Hrisikesh Panda, IAS Govt. of India atanga lo kal te nen sorkar thuneihna sem zai chungchang Chief Secretary\\\'s Conference Room ah an sawi ho.

He meeting ah hian Lai, Mara leh Chakma District Council atangin an Chief Executive Member leh Chairman theuh te bakah member engemaw zat tawiawmin an tel a. Mizoram sorkar Departmenth hotu lu engemaw zat an tel bawk.

An meeting ah hian Village Council te thuneihna chungchangte, rorelna khawla hmeichhiate tan a seat hauh sak a tul thu te pawh an sawi a. District Council-a hmeichhiate tan a seat reservation an siam sak mek ang a State sorkar-ah pawh hmeichhiate tan seat siam sak ve a tul thu te an sawi chhuak bawk. Hei bakah hian NREGS hnathawh dan kalphung leh hmalak tawh a hriatthiam loh lai te an in hrilhfiah a ni.

Chief Secretary hi Pu P. Chakraborty , MJS, Principal Legal Adviser & Principal Secretary leh Pu Biaktluanga, Secretary LAD ten an tawiawm a. District Council LADC atangin Pu C. Ngunlianchunga CEM, Pu F. Rohnuna, Chairman ; MADC atangin Pu V. Vanhupa, EM leh Pu F.C. Zase, Chairman CADC atangin Pu Kalikumar Tong, CEM leh Pu Sushil Kumar, Chairman te bakah an hotu lawk ten an tawiawm bawk. Special Invitee Dr. Lalneihzova, MZU pawh a tel bawk.