No.3532/2020-2020

Aizawl, the 28th July 2020: Vawiin khan School Education Minister Pu Lalchhandama Ralte leh Pu C.Lalmuanpuia MLA ten East Tuipui biala khaw hrang hrang Lirnghingin a sawi te an tlawh a, tun hnaia lirnghingin vawi engemawzat a sawi avanga mipuite tuarna leh thil a tihchhiatte a hmunah an en dik.

Minister leh MLA te hian Khuangleng, Leithum, Dungtlang, Samthang, Khuangthing leh Zawlsei khua te an tlawh a. Heng khaw hrang hrang an tlawhnaah hian Minister Pu Lalchhandama Ralte chuan lirnghingin a sawi thin avanga mahni inchhung lumah pawh riak ngam lo khawpa heng khaw hrang hrangte an awm reng mai chu sorkarin pawi a ti a, a tuarpui hle tih a hrilh a. Chief Minister-in he tlangdung vanduaina hi a ngaihpawimawh avangin a thei thei a hmunah kal a tha a tih anga kal an nih thu leh Lirnghing avanga harsatna an neihte a hmuna va hmuh saka beng chhi tura kal an nih thu a sawi. Covid-19 hripui leng avangin sorkar hnathawk pawh an hlawh pe kim thei lo dinhmunah sorkar chu ding mah sela, sorkarin mipuite himna a ngai pawimawh a, a thawh theih ang ang te thawh a ni dawn a ni a ti.

Minister chuan Sorkarin thiltih dan tur a dap mek a, MP Pu K.Vanlalvena pawhin Delhi-ah mipawimawh hmuin mithiamte tira en turin a ngen a, mahse, tunlai boruakah rawn zin hleih theih a ni lo a. Mizorama mithiam kan neih ten he chhiatnaa sorkar tih theih tur leh hmalakna tur rawtna an siamte a theih ang angin thlir zui zel a ni dawn a ni a ti.

Minister leh MLA in khaw hrang hrang an tlawhnaah hian mipuite riahna tur buk sakna atan silpoulin leh pawisa fai an hlan a, heng an khaw tlawh mipuite hian sorkarin a ngaihsak avanga an thlamuanpui thu an lo hrilh hlawm a ni.