1857/2024-2025

Aizawl dated 1st September, 2024: Vawiin chawhnu khan Vaivakawn Zohnuaia Pu Sangthanmawia building, chhawng 7 a sang chu a chim a. Aizawl District Disaster Management Authority hruaitute leh Quick Response team-te chuan a tul angin hma an la nghal a. Er. Lalhriatpuia, Deputy Commissioner leh Chairman, District Disaster Management Authority chuan Department hrang hranga thawktute leh khawtlang hruaitute nen hmalak dan tur ruahmanna an siam nghal a ni. 

Vaivakawn Zohnuaia Pu Sangthanmawia building hi, khawtlang hruaitute tarlan danin, kum 2017 vel atanga che tan tawh niin tum engemaw zah khawtlang leh Sawrkara thuneitute pawhin an endik tawh a. Aizawl District Disaster Management Authority chuan August ni 29, 2024 khan khawtlang him zawk nan thiat tura thupek a lo chhuah tawh a ni.

Vaivakawn Zohnuaia in chimna hmun hi Sports & Youth Services Minister Pu Lalnghinglova Hmar, bialtu MLA ni bawk chuan tlawh nghalin he vanduaina thleng avanga thi leh hliam an awm lo chu lawmawm a tih thu sawiin khawtlang leh Sawrkar a mawhphurtute inbuatsaihna fakawm a tih thu a sawi a. Vanduaina tawk chhungkua te a lainat thu a sawi. 

Building chim avang hian Vaivakawn Zohnuai road, MZU panna kawng ah Two wheeler bak a tlang thei rih lo a. Vaivakawn atang a Chhangurkawn panna kawng erawh lirthei tlan thei a siam a ni. Chhungkaw 10 vel chu hmun him zawk a insaseng tur a tih niin Govt. Zohnuai Primary school pawh thiah tura thupek chhuah a ni a. Tui kawng mumal tak siam tura rel niin a tul angin Tui Connection pipe leh SIPMIU pipe Lian put a awm leh awm loh endik tura rel a ni bawk.

Aizawl DC, Er. Lalhriatpuia hova ruahmanna siama thutkhawmnaah hian Geology & Mining, PWD, Police leh I&PR Department-a thawktute an tel a ni.

Attachment

  • Loading attachment...