873/2024-2025

Hnahthial the 19th June 2024: Hnahthiala cham mek South Tuipui bialtu MLA Pu Jeje Lalpekhlua chuan tukin zing khan Hnahthial Model Veng chuan hnuaia leiminna hmun a tlawh a, siam that dan tur a enpui. Hemi rual hian YMA te leh Sports Association thenkhatin a hnena mamawh an thlen te a hmunah kalin a enfiah a, Govt. Southern High School a tlawh bakah MLA Office-ah amah dawr duhte dawr theih turin a thu chhunzawm leh a ni.

Hmanni Cyclone Remal in a ken tel ruahsur in Model Venga Pu J. Rokima te kawmthlang lei tlawh/min avanga an in luah ngam lova an chhuahsan tak chu chhiatna lian zawk a thlen hmaa an kawmthlang lei tawlh siam that dan tur a enfiah bawk.  Hei bakah hian Model Thlanmual thar turte, Model Field laih mek te, Venglai YMA Volleyball Court te, Peniel Branch YMA in sak mek te, Hnahthial Tennis Court siam that dan tur leh an mamawh phuhruk a nih theih nana hmalak dan turte a hmunah kalin a enfiah nghal bawk a ni.

Tukthuan eikham-ah bialtu MLA chuan Govt. Southern High School tlawhin an mamawh leh harsatna an neihte a hmunah a enfiah leh hnuah MLA Office Hnahthial-ah a duh apiangte dawr theih turin a thu chhunzawm a, chawhnu lamah Hnahthial District a head of offices thenkhat te meeting a neihpui hnuah zanin hian Hnahthial chhuahsan in Aizawl a pan leh nghal dawn a ni.