236/2025-2026

Dated Hnahthial, the 21st April, 2025: South Tuipui bialtu MLA, Pu Jeje Lalpekhlua chuan tukin zing khan Hnahthial District Hockey Association hruaitute nen HnahthialanSynthetic Hockey Turf siamna tura ruahman chu an en a. Hemi hnu hian MLA Office, Hnahthialah amah dawr duhte tan hun hawngin Govt. High School a tlawh bawk.

Pu Jeje Lalpekhlua, MLA chuan sorkar laipui, Ministry of Minority Affairs hnuaia Pradhan Mantri Jan Vikas Karyakram (PMJVK) Division atangin Hnahthialah Synthetic Hockey Turf siamna tur sum cheng vaibelchhe kua point pariat pariat (Rs. 9.88 cores) an hmuh tur thu sawiin Hnahthial District chuan Hockey ground tha tak kan nei thei tur chu lawmawm a tih thu a sawi a. Hnahthiala Synthetic Hockey Turf siam a nih theihna atana hma lakpuitu, Chief Minister leh Sports Minister chungah lawmthu a sawi nghal a ni.

MLA Office-ah hian amah dawr duhte tan hun hawngin pawl leh mimal hrang hrang chuan dawrin an mamawhte MLA hnenah hian an thlen a ni. District Child Protection Unit, Women & Child Development, Hnahthial District chuan thuchhuah siamin South Tuipui Bialtu MLA, Pu Jeje Lalpekhlua'n Hnahthial District chhunga Child Care Institution ‘Gardenia Girl's Home’ tan Puan-thui khawl tha tak leh tangkai em em tur a hlan chu MLA chungah thinlung takin lawmthu an sawi tih an tarlang.