795/2026-2027

Dated Hnahthial, the 1^st June, 2026: Vawiin khan Pu Jeje Lalpekhlua, 29th South Tuipui A/C bialtu MLA chuan District Rural Development Office (DRDO), Hnahthial buatsaihin WCD- PMKSY 2.0 hnuaia loneihna hmanrua (Farm Tools) chu a bial chhunga khaw pathum - Khawhri, Tarpho leh S. Chawngtui te tan a sem a. S. Chawngtuiah hian Thingpui fe sawngbawlna tur - Tea Processing Unit chu a hawng nghal bawk a ni. 

Pu Jeje Lalpekhlua chuan DRDO, Hnahthial hmalakna hnuaiah Khawhri, Tarpho leh S. Chawngtui khawtlangten hamthatna bungrua hrang hrang an dawng thei chu lawmawm a tih thu sawiin DRDO hnuaia thawktute chu an thawhrimna leh hmalaknate fakawm a tih thu a sawi a. Loneitute chuan sawrkar atanga an bungraw dawnte chu tangkai taka hmang ngei tura chahin an hnathawhna kawng hrang hranga chhawk zangkhaitu a nih ngei a beisei thu a sawi bawk. S. Chawngtui khuaa Thingpui fe sawngbawlna tur - Tea Processing Unit hawn a ni thei chu lawmawm a tih thu sawiin khawtlang mipuite chu chhawr tangkai ngei turin a fuih nghal a ni. 

MLA chuan sawrkar-in sawhthing market mumal leh tha zawk a buatsaih avanga thingtlang lo neituten sum tam zawk an la lut thei ta leh MUHCS a kalpui avanga dinhmun harsa zawk ten inenkawlna sum senso tam tak an lo hum thei ta chu lawmawm a tih thu a sawi a. A bial mipuite ah heng hamthatna hrang hrangte chhawr tangkaitu tam tak an awm chu lawmawm a tih thu sawiin a chhawr tangkaitu ni theuh turin mipuite chu a sawm nghal a ni. 

WCD - PMKSY 2.0 hnuaia Farm Tools khaw hrang hranga sem zat chu tarlan ang hi a ni :-

1. S. Chawngtui : Brush Cutter - 14 ; Sprayer -9

2. Khawhri : Brush Cutter - 24 ; Sprayer - 5 ; Amla Juicer - 2 ; Turmeric Grinder - 1

3. Tarpho: Brush Cutter - 10 ; Sprayer -11

S. Chawngtui a Tea Processing Unit hawnna leh Farm Tools semna Programme hi Pu HD. Lalpekmawia, PD, DRDO chuan a kaihruai a. Kum 2021-22 atanga kalpui tan, PMKSY 2.0 project chu a lo tawp dawn tak thu sawiin Project kalpuina khua S.Chawngtui, Khawhri leh Tarpho te chuan PMKSY 2.0 atanga hmalakna kawng hrang hrang leh tanpuina an dawn zawng zawngte chu Project tawp ruala tawp ve mai lova, chhawr tangkai chhunzawm tum ngei turin a fuih a ni.