Vawiin khan Mizoram Assembly Speaker Pu R.Romawia hovin Minister leh MLA rualte chuan I&PR Conference Hall-ah RTI Act, 2005 leh Information Technology hman tangkai chungchanga training an nei.

He Training hi Pi Sailuti, Dy.Director ATI in a kaihruai a. Training hawnna inkhawm ah thu sawiin Speaker chuan RTI leh Information Technology chu thil kalkawp tlat a ni tiin MLA te chu IT hmang tangkai thei tura an inbuatsaih a pawimawh thu a sawi a. Sorkar laipui Ministry hrang hrang te leh state sorkar department ten website an siam atanga thil hriat zung zung theih chuan sorkar leh mipui inkarah inpawhna tha a siam a; IT hian Right to information leh langtlang sorkar min neihtir a ni, a ti a. Tunlai khawvle thiamna thang zelah ram roreltute chu thim zinga awm bik tur an ni lo, tiin heng thiamna te hi chhawr ve thei tura he training hi hman tangkai tum turin a fuih a ni.

Training ah hian Minister leh MLA Aizawla awm zawng zawngte an tel a. Pu Vanlalvuana, Asst.Director ATI in training course hrilhfiahin MLA te hi a zirtir a ni.