Mizoram Legislative Assembly Speaker Pu R. Romawia chuan vawiin khan a bial chhung Chaltlang veng tlawhin veng chhunga hmasawnna tur mamawh hrang hrang khawtlang hruaitute nen an fang kual.
Speaker ho hian Chaltlang Dawrkawna Bazar Building chu uluk taka enho a ni a. Hun rei tawh tak atanga an hman tangkai em em he Bazar Building hi siamthat leh nghet zawka do a tul zia te, PWD mual atanga Tatkawng veng paltlanga Chaltlang Dawrkawna chhuak tur kawngpui sial dan tur te a enpui bawk a. Chaltlang Field bula Local Council House sak an rawt te pawh a hmunah kalin thil awmdan khawtlang hruaitute nen an sawiho a ni. Speaker hian MLA fund atanga Chaltlang South Branch MHIP inchung a khuhsak te pawh a tlawh nghal bawk.
Speaker Pu R. Romawia lo dawngsawngtu Chaltlang veng chhunga tlawmngaipawl hrang hrang te chuan an mamawh leh rawtna engemawzat an lo thlen a. Speaker chuan Mizoram MLA te hi rampum leh hmarchhak State zingah pawh MLA Fund nei tlem ber pawl ami an nih thu leh chutichungin an bial chhungah a zai thei ang bera an sem dan te, a dawngtu te pawhin vantlang tana tangkai taka an hman thin dan te chu fakawm a tih thu a sawi a ni.
Speaker tawiawm tu sorkar Department hrang hrang aiawh te, khawtlang hruaitu te leh tlawmngai pawl hrang hrang aiawh te nen inpawh takin Chaltlang veng hmasawnna tur te an sawi ho a ni.
