2630/2022-2023

Aizawl 12th November 2022: Vawiin khan Assembly Speaker Pu Lalrinliana Sailo chuan a bial chhung Khawruhlian Vengthar Branch YMA Rising Day vawi 32-na Khuallian niin a hmanpui a, Pu H.  Lallianmawia E.E PHED chu khual zahawm a ni.

He huna Khuallian Assembly Speaker Pu Lalrinliana Sailo chuan Khawruhlian Vengthar Branch YMA-in a din champha vawi 32 -na a thleng thei chu lawmawm a tih thu sawiin, YMA chu Mizo hnam himna tur atana Pathian hmanrua a nih thu sawiin, pawl ropui ber YMA leh Kohhran te tawngtaina avanga he ram leh hnam pawhin tun hun hi thleng mek kan nih thu sawiin, Hnam nun zemawi leh Mizo nun dan tha hi YMA chhang atanga inzir thar a tul thu a sawi bawk a ni.

Kan ramin siamthatna kawng tam tak a mamawh mek karah Kohhran leh Khawtlang nun tichhetu leh thalai rilru eichhe mektu Social Media kan hman dan a vei thu sawiin, social media platform hrang hrang te hi hman thiam chuan finna te, hriatna tizautute a nih theih rualin tun hunah chuan kan ram leh hnam chhe thei ang bera chhuah te, mi mal nun a dik pawh thlu lova chhe thei ang bera inchhuah ringawt mai te hi hnam tan a pawiin, lungrualna vawchhe thei a nih avangin heng kawngah hian YMA member te fimkhur turin a chah bawk a ni.

Khawruhlian Vengthar Branch YMA hi kum 1990 November Ni 12 ah Khawruhlian Branch YMA atanga indangin tunah hian members 645 awm mekin, khawtlang huap ruai nen vawiin rising day hi khar a ni.