1676/2025-2026

1st October, 2025 : Vawiin khan Phullen Community Hall-ah Phullen MUP ten MUP Day an hmang a, Assembly Speaker Pu lalbiakzama’n khuallian niin he hun hi a hmanpui.

Khuallian Pu Lalbiakzama chuan he ni hmang tura kalkhawmte hmaah thu sawiin, upa te hi tuna kan khawvel hman mek siamtute hi an ni a, ţhalai te hian hetiang dinhmun min siamsaktu Pathian leh Upa te hnenah hian lawmthu kan sawi fo tur a ni a ti a. Tunlaia Mizo ţhalai boral kan tam dan ngaihtuah chuan kum 70 chu sawi loh, kum 60 dam pawh a hnam nawlpui ang chuan thil huphurhawm a ni ta hial mai. Chutih mek laia kum 80 tling heti zat Phullen khua in chawimawi tur kan nei che u hi a ropui a. Kum 100 tling tawh mi pahnih kan la kawl lehnghal hi a ropuina tizual tu an ni. Mizoram ah hian kum 100 tling chin awmna khua hi a tam lo hle in a rinawm a ti.

Chalfilh Constituency-ah hian khaw lian bik paruk a awm tih sawiin Speaker chuan mihring tam dan in dawt in, Sesawng, Phuaibuang, Khawruhlian, Phullen, Khawlian leh Suangpuilawn te a ni a. Chung khaw lian bik 6 zingah chuan Phullen chiah hi development hmalakna ţobul BDO ţhuthmun awmchhun kan ni a, damdawi in pali awm zinga khaw pakhat kan ni bawk. Hetiang hi Phullen khaw dinhmun a nih avangin Phullen khua hian rilru zim kan pu thiang lo a. Kawng tinreng ah ringtu nunah te, khawvel inawpna thil politics te, tlawmngai pawl leh mimal rilru sukthlek chenin rilru zau, thinnel, khaw ţangrual, sorkar thawhpui thiam lama hmahruaitu leh entawntlak nih hi kan tih a mawi a ni satliah lo a, a bata kan bat a ni tih hi kan hre reng tur a ni a ti.

Phullen MUP Day lawmna inkhawm hi an president Pu B. Lalnuntluanga’n a kaihruai a, khawtlang hruaitute leh tlawmngai pawl hrang hrangte pawhin he hun hi an hmanpui a ni.