1024-2024-2025

Aizawl, the 1st July, 2024: Vawiin khan Mizoram Speaker Pu Lalbiakzama leh Adviser to Chief Minister (Implementation of Hand Holding Policy) Dr. K.C. Lalmalsawmzauva te chuan Sairang Horticulture Centre leh Zoram Mega Food Park Pvt. Ltd., Khamrang te tlawhin hmalaknate an enfiah a, thlai ei chi Sawrkarin a hralhna a buaipui turte lei khawlna tur hmun, a dahthatna, sawngbawlna leh hralh chhuahna tur hmun atan Horticulture Centre leh Zoram Mega Food Park Pvt. Ltd. hmunhma awmsate hman tangkai dan tur leh a remchan dante an thlithlai a ni.

Speaker Pu Lalbiakzama chuan kuthnathawktute thlai leh thei thar chhuahte lo dawnsawn leh a dehral kawngah sawrkar chu theihtawpin a inbuatsaih chho zel tih sawiin, "Thlai thar a nihna ang anga hralh chhawn vek rem lote sawngbawl (process) dan kawngte a awm em tih zir mek zel a ni a, chutiang tur chuan sawrkar hmunhma awm sa Sairang Horticulture Centre leh Zoram Mega Food Park Pvt. Ltd., Khamrang te hi tangkai taka hman theih dan kawng zawn a tul hle a ni,” a ti a. Heng hmalakna hi sawrkar kuta dah ngawt lo a sawrkar ṭawiawm turin a kaihhnawih mimal leh pawlte a sawm a ni.

Adviser to CM (Implementation of Hand Holding Policy) Dr. K.C. Lalmalsawmzauva chuan thlai tharte man man zawk leh hlawk zawka dehral a nih theih nan sawrkarin ngaihtuahna nasa tak a sen thu a sawi a. Hand-holding policy-ah hian kawng tam takah mipui dawmkanna tur ruahmanna awm mah se, kan mamawh hmasa ber kan thlai tharte hlawk taka sum chan tir hi thil tul hmasa ber a ni, a ti bawk.

Sairang Horticulture Centre tlawhnaah hian Pu C. Zosangliana, DHO Aizawl leh a thawhpuite'n lo dawngsawngin hmalakna tlangpui an lo hrilhfiah a. Zoram Mega Food Park Pvt. Ltd. Khamrang ah hian Director Pu Lalrinmawia Tochhawng leh a thawhpuite'n lo dawngsawng hmunhma pawimawhte tlawhin an hrilhfiah a. Thlai thar lei, lakkhawm, dathat leh sawngbawl kawnga ruahmanna awm thei tur angte chipchiar takin an sawi ho a; an harsatna leh hmalak tul angte lo thlenin sawrkar hmalakna chu a theih ang anga tawiawm an inhuam thu an sawi a. Speaker leh Adviser to CM (Implementation of Hand Holding Policy) te chuan sawrkar a hmanhmawh tawh avangin thlai lei tur a bik takin sawhthing thar hma ngeia hmunhma siamthat ngai leh tul dangte lo bawhzui thuai turin an chah a ni.

He hunah hian Speaker leh Adviser to CM (Implementation of Hand Holding Policy) te hi Pu H. Lalhmunsiama, Addl. Director, Commerce & Industries, Member, MSPCC, Pu LP Lalchangkima, Managing Director, ZIDCO & Member, MSPCC leh Official dangte'n an tawiawm a ni.