877/2026-2027 

Champhai, 6th June 2026: Electoral Roll ennawnna beihpui - Special Intensive Revision neih mekah vawiin khan Champhai Bawrhsap, District Election Officer (DEO) ni bawk Pu Mohammad Aaquib chuan Champhai khawpui chhunga Booth Level Officer (BLO) te a tlawh a. Harsatna an neih te enfiahin, chak zawk leh tluang zawka hmalak chhoh dan te an sawiho a ni.

Champhai DEO Pu Mohammad Aaquib hian 24-Champhai South huamchhunga Booth Level Officer pasarih - Champhai Vengthar, Tlangsam - I & II, New Champhai, Zotlang I & II leh Ruantlang bakah 23-Champhai North huamchhung - Champhai Vengthlang chhunga Booth pali- Dawr Veng, Rahsi Veng, IB Veng leh Awmpui Vengte a tlawh a. Special Intensive Revision chu thil pawimawh tak anih avangin, Booth Level Officer leh anmahni puitu Addl BLO te, Booth Level Standing Committee chu thawhhona tha tak nei tur leh theihtawp chhuah turin a ngen a. Harsatna an neih te chu DEO Office a thlen hreh lo turin a chah bawk.

He hunah hian Booth Level Officer te nen inkawmhona hun tha tak neih a ni a. An harsatna te chinfel dan tur ngaihtuah pui an nih bakah huntiam chhunga an tihtur te an tih zawh ngei theih nan an hriatthiam loh te hrilhfiah nghal zel an ni bawk a ni.

District Election Officer Pu Mohammad Aaquib hi Election Officer Pu Ngulzathuama; Champhai South AERO Pu Lalchhuanawma Ralte, SDC; leh Pi Zohlimpuii, SDC ten an tawiawm a ni.