No.857/2021-2022

Dated Serchhip, the 8th June, 2021 :Vawiin hian Special Investigation Team on Forest Fire te chuan Serchhip tlawhin tun hnaia Serchhip district chhunga ram kang chhuahna hmunte a hmunah an tlawh.

Special Investigation Team on Forest Fire te hian Serchhip Chanmary venga ram kang chhuahna hmun tlawh hmasa berin a theih chin chin kein an fang kual a, chumi hnuah Serchhip leh Keitum inkar, Dawngzawl ram leh a chhehvel te an tlawh leh a; chumi hnuah Serchhip District chhunga kumina ram kang nasa ber awmna Thinglian ram thlirin Khawlailung leh Piler tlangah te an kal leh a ni. Thinglian hi Special Investigation Team te hian tlawh duh hle mah se tun hnaiah ruah a tlak avangin a panna kawng lamah harsatna a awm theih avangin a ram thlir theihna hmun remchangte atangin an thlir ta zawk a ni.

Heng ram kang hmunhma an tlawhnaah hian Serchhip Bawrhsap Pu Kumar Abhishek, IAS te, Pu Lalmuansanga, MCS, Addl. DC te, Pu Stephen Lalrinawma, MPS, SP te, Pi Margaret Lalramchhani, DFO Thenzawl te leh District Level Committee on Fire Prevention member dangte leh ram kang chhuahna khawtlang hruaituten an tawiawm hlawm a. Kumina ram kan dan mai thlir lovin kum hmasa lama ram lo kan tawh dan hrang hrangte sawi hovin heng ram kang thinte a thlen tawh lohna tura tul nia an hriatte, a lo awm palh pawha rang taka thelh a nih theih dan tur nia an ngaihte an sawiho a ni.

Mizoram sawrkar chuan May ni 5, 2021 khan State Level Special Investigation Team (SIT) dinin, thla 2 chhunga report peih fel hman tura tih an ni a. SIT-ah hian Mizoram Chief Conservator of Forests (Administration) Pu RS Sinha chu Chairman niin, member dangte chu Pu C. Lalthanmawia, Director, Fire & Emergency Services; Pu Lalthafamkima Jongte, AIG (Ops), Police Headquarters leh Pu John LT Sanga, Director, Disaster Management & Rehabilitation (Member Secretary) te an ni a. May ni 21 khan Serchhip District Level Committee on Fire Prevention leh sawm bik mi pawimawh te nen Virtual Meeting an lo nei tawh a, vawiin hian anmahni ngei lokalin kangmei chhuahna hmunte an rawn tlawh leh a ni.