Special Olympics World Summer Games 2015, Los Angeles-a 25^th July – 2^nd August chhunga inelna aIndia aiawha Mizo telte chu vawiin khan Aizawl rawn thlenpui an nih hnuah Vanapa Hall-ah anmahni puala lawmna hun hman a ni a, Sports Minister Pu Zodintluanga’n a hmanpui a ni.

Pu Zodintluanga chuan keini India ram kilkhawra awm ten khawvel pum huap hetiang inelnaa India aiawha kal Vohbik ten lawmman an dawng thei chu ropui a tih thu a sawi a. He hlawhtlinna hi a enkawltu zirtirtu te leh an nu leh pa te enkawlna rah avang liau liau a neih a nih thu a sawi. Mizoram Sports Department hnuaia category bithliah hrang hranga state leh ram aiawha hlawhtlingte lawmman pek thin Incentive Cash Award pek an nih tur thu a sawi a ni.

Vohbikte tana buatsaih Special Olympics neih zawh takah hianIndiaram aiawhin Mizo 7 an tel a. Gelead Special School atangin Alfred Lalchhanhima, Lalmawizuala leh  Thanghmingliana te an kal a. Govt. Aizawl College atangin Lalthansanga Fanai (Unified Partner) leh Tuikhuahtlang atangin Zohlupuii te an kal a ni.

He lawmna puala inkhawm hi Pu Zoliana Royte, Area Director, Special Olympics Bharat: Mizoram Chapter chuan a kaihhruai a Special Olympics lo chhuah dan leh a chanchin a sawifiah. Health & Family Welfare Minister Pu Lal Thanzara chuan Chief Minister aiawhin infiammite hi lawmman a hlan a. Sports Association hrang hrangten lawmpuina thilpek leh thuziak an hlan.

Vawiin programme ah hian Sarah Lalmuankimi an inelnaa kaihruaitu India aiawh Basketball Female Team Head Coach chuan Special Olymics an neih chhunga inelna hrang hrang kalpui anih dan leh hun an hman dan te a sawi bawk.

Special Olympics ah hian ram 177 atangin Special Athletes 7000 vel an tel a. India aiawh hian Item 14 ah mi 300 vel telin India hian Gold 47; Silver 54 leh Bronze 72 an la a ni.