Election Commission of India thupek angin Mizoram pumah Photo Electoral Rolls Special Summary Revision 2015 chu vawiin khan tarchhuah a ni a. Aizawl District ah chuan Pu Lalchungnunga, Addl. DC kaihhruaina in a Room ah he hun hi hman a ni.

Pi H. Lalchhandami, Election Officer in hemi chungchang sawihawnna hun a hman zawh hnuin recognised party hrang hrang BJP, MNF, INC, MPC leh ZNP te hnenah a soft copy leh hard copy Pu Lalchungnunga hian a hlan a. Soft copy a lei ve duh an awm chuan Rs. 100/- in leh a hard copy phek 1 Rs. 5/- zelin lei theih a ni.

Aizawl District ah chuan electors 5587 in an pun belh a, chu chu 2.13% a ni. Hming paih tamna ber chu 18-Aizawl South I (ST) a ni a, hming 414 paih a ni. Paih tlemna ber chu 9-Tawi (ST) a ni a hming 251 paih a ni. Aizawl District chhungah hian a pumpuiah 11353 in hmeichhia, mipa aiin an tam zawk a ni. Aizawl District huamchhunga Assembly Constituency 14 ah hian Polling Station 323 a awm a, chawhrualin Polling Station pakhat zelah Elector 827.59 awm ang a ni. Aizawl District pumpuiah EPIC 100% neih a ni a. Tun Special Summary Revision of Electoral Rolls, 2015 ah hian EPIC chi thar PVC Smart Card kumtling tharte hnenah pekchhuah a ni.

Draft Photo Electoral Rolls hi 15.10.2014 atang khan mipuite en theih turin tarchhuah a lo ni tawh a. Hemi ni atang hian Rolls te hi paih ngai leh belh ngaite endikin buaipui chhoh char char a ni a. Tichuan Photo Electoral Rolls chu vawiin khan tarchhuah a lo ni ta a, he Rolls hi a duh apiang en theih turin DC office, ERO/AERO office bakah vengchhunga Booth Level Officer te hnenah dah a ni ang.