Thian duhtakte u,
Kan ram ropui tak Independence Day vawi 69-na ni chhinchhiahtlak takah hian Mizoram mipuite hnenah leh vawiina he hmuna lo kal khawm zawng zawng te hnenah duhsakna chibai ka buk a che u.
Ram dang awpbehna laka kan ram hruaichhuak tura kan hnam pa Mahatma Gandhi te, Pandit Jawaharlal Nehru te, Sardar Vallabhai Patel leh midang ten an theihna zawng zawng senga an inhlannate chu vawiin hian kan ngaihluin kan hre reng a ni. Kan zalenna tura mittui leh thisen senga he hnam ropui tak dintu te beisei leh hmathlir hlenchhuak turin i inhlan thar theuh ang u.
He ni pawimawh takah hian kum kalta chhunga kan Sawrkar hmalakna te han tarlan ka duh a ni.
1. Vantlang himna leh dan leh thupek kenkawh chu ngaihpawimawh hmasak niin dan kengkawhtu te, tlawmngai pawl te, Kohhran te, thu thar thehdarhtu te leh mipui vantlang thawhhona azarah Mizoram chu, ram puma State muanawm berte zingah kan vawng thei a. Chutiang boruak duhawm tak kan neih mek laiin ni 28.3.2015 khan Committee on Government Assurances member te zin chu Zokhawthiang/ Kani khaw daiah HPC(D) helho ten lo lambunin Mizoram Police mi 3 kahhlum an ni a, mi 5 ten hliam an tuar bawk a ni. Chung hel ho beih let hna chu Mizoram Police ten thawk nghalin Police Constable tlanbo, self styled Sgt. Malsawmkima chu ni 8.5.2015 ah Mizoram-Manipur ramri ah kahhlum a ni. Kha inlambunna tenawm tak kha kan dem tak zet a, Mizoram chhungah remna leh muanna vawng him tlat turin Sawrkar chuan theihtawp a chhuah zel dawn a ni tih mipui hriatah ka puang nawn duh a ni. Police te tha tichak turin Modernisation of Police Forces hnuaiah hmanrua leh ralthuam tha zawk nen Mizoram Police te chu thuamthat mek an ni a, Aizawl City Surveillance Project (Phase-I) pawh ni 25.5.2015 ah hawn niin Aizawl khawpui hmun pawimawh ah CCTVs (camera) bun fel an ni tawh a ni.
2. Sawrkar flagship programme New Land Use Policy (NLUP) chu chak taka kalpui zel niin Mizoram tihhmasawnna tura ruahmannate a hlawhtling chho mek bawk a ni. NLUP hnuaiah hian beneficiaries 90,139 te hnenah tanpuina pek an ni tawh a, midang 44,861 te hnena tanpuina pek turin chak taka bawhzui mek a ni.
NLUP Revitalization Programme duan hmangin Sawrkar chuan beneficiaries te hamthatna leh mamawh a ngaihtuahsak zel a. Tun kum 5 kal mek chhunga project duan leh tihhlawhtlin lama harsatna tawh leh siamthat ngai lai te zirchian niin a tul angin bawhzui mek a ni.
Tunhnai lawk khan UN Resident Co-ordinator leh UN Agencies hrang hrang - United Nations Development Programme (UNDP), United Nations Industrial Development Organisation (UNIDO), Food and Agriculture Organisation (FAO) leh International Labour Organisation (ILO) te nen thawhhona thuthlung Memorandum of Understanding (MoU) ziah fel a ni a. UN Agencies te nena he MoU ziah fel a nih hnu hian ram engemaw zat chuan ramngaw, leilung leh chhehvel boruak humhalha vawnhim bakah, eibar zawnna kawnga chhawmdawlna leh tui leh ram leilung enkawlna kawngah Mizoram Sawrkar thawhpui duhin an rawn ngaihven a ni.
FAO, Ministry of Agriculture, Government of India leh Mizoram Sawrkar ten Technical Co-operation atana inremna an ziah fel atangin sum US $ 496,000 (Rs 3.15 crores) sanction order hmuh tawh a ni a. Hei hi UNO(FAO) atanga direct funding hmasa ber a ni. Mizoram Sawrkar leh Tata Trust chuan MoU ziak felin NLUP programme nena kalkawp eizawnna tihchangtlun nan Tata Trust te hian cheng vaibelchhia 18 an thawh dawn a ni. Hei bakah hian Mizorama Supportive Dairy Intervention Programme (SDIP) atan Tata Trust hian cheng vbc 2.30 an dah hrang tawh bawk a ni.
Pawnlam atanga endiktu Third Party Monitoring Agency NABCONS chuan tlangram lo neih titlem tur leh mipuite tana eizawnna ngelnghet siamsak turin NLUP hmalakna hian rah tha a chhuah mek tiin a hmuh dan a tarlang a ni.
3. Inkalpawhna kawngpui siam hi Sawrkarin a ngaipawimawh hle a. Kum 2014-2015 chhung khan Public Works Department chuan NEC scheme hnuaiah cheng vbc 14.16 sengin Tlabung-Kawrpuichhuah kawngpui (16.42 km) a siam zova, cheng vbc 171.98 sengin Special Accelerated Road Development Programme in North East (SARDP-NE) hnuaiah Kawnpui - Buichali kawng NH 54 (2 lane) leh cheng vbc 2.23 senna NLCPR scheme hnuaiah Chuhvel - Sihthiang kawngpui (11 km) chu siam zawh a ni bawk. Hei bakah hian cheng vbc 3,030.86 senna tur inkalpawhna kawngpui hrang hrang 170, kilometre 3713.285-a thui siam mek a ni bawk. Kum 2014-2015 chhung vek khan Saitual-Saichal-NE Bualpui kawnga Tuivawl luiah NEC scheme atangin cheng vbc 3.00 sengin lei dawh a ni a, Chhingchhip-Hmuntha kawngah NLCPR sum cheng vbc 12.99 hmangin Tuikum lei dawh a ni a, Chhingchhip - Thentlang kawngah NLCPR scheme hnuaia sum cheng vbc 2.48 sengin Tuikual luiah lei dawh a ni a. Cheng vbc 43.64 senna tur lei pali (4) dawh hna chu thawh mek a ni bawk.
Mizoram State Roads-II Regional Transport Connectivity Project (MSR II - RTCP) hnuaiah Chhumkhum-Chawngte kawngpui (cheng vbc 270.27), Champhai - Zokhawthar kawngpui (cheng vbc 222.38) leh Tlabung - Kawrpuichhuah kawngpui (cheng vbc 180.17) thawmthat leh chei hna thawh mek a ni a. Asian Development Bank (ADB) sum cheng vbc 259.20 hmangin Serchhip-Thenzawl-Buarpui kawngpui cheithat hna thawh mek a ni a, Kaladan Multi Modal Transit Transport Project (KMMTTP) hnuaiah cheng vbc 677.20 senna tur kawngpui 99.83 km zeta thui siam hna chak taka kalpui mek a ni bawk. NLCPR sum cheng vbc 24.81 hmangin Lengpui Airport cheithat hna thawh mek a ni a. New Town, Kolkata-a Mizoram House pawh Special Plan Assistance atangin cheng vbc 21.43 senga sak zawh niin May 15, 2015 khan hawn a ni.
4. Mizoramin tui chakna hmanga kawlphetha siam chhuah theihna a ngahzia hriain kawlphetha tam zawk siamchhuak turin kawng awm thei zawng zawng kan dap reng a. Tuivai Hydro Electric Project (210 MW) sakna turin Mizoram Sawrkar chuan North Eastern Electric Power Corporation (NEEPCO) nen thawhdunna thuthlung Memorandum of Understanding a siam a, hna hi tan thuai tum a ni. Tuirial Hydro Electric Project (60 MW) sak hna pawh chak takin thawh mek a ni a, October 2016 ah hawn theih beisei a ni. Tlawva Small Hydel Project (5 MW) leh Kawlbem Small Hydel Project (3.5 MW) te pawh thawh mek niin kum 2017 ah zawh hman beisei an ni. Tuiching leh Tuiriza Small Hydel Project (100 KW ve ve pe chhuak thei) te pawh kum 2016 chhungin zawh hman beisei an ni. Mizoram Sawrkar chuan Tuirini Hydro Electric Project (25 MW) chu State Sector ah dah a rel a, he project thawh nan hian New Development Bank, Shanghai leh funding Agencies dang ah sum ngaihtuah turin chhawp tum mek a ni. State Sawrkar chuan nizung chakna kawlphetha Solar Photovoltaic (SPV) Power Plants/Solar lighting thingtlang hmun kilkhawr 47 ah a bun fel tawh a, District 6-a khaw 508 tan khawlai tihenna Solar Photovoltaic (SPV) Street Lighting Systems 4000 bun turin thawh chhoh tum mek a ni. Sawrkar chuan Serlui B Project tuikhuah ah 2 MW floating Solar Power Plant bun turin hma a la mek a. Pukpui (5x2 kw), Cheural (8kw) leh Tuipang ‘V’ (5kw) ah Wind Solar Hybrid Power Plants pathum din thuai a ni dawn bawk a ni.
Kawlphetha tha leh rintlak zawk kan neih theih beiseiin kum 2014-2015 chhung khan substation thar pali (4) leh khawlphetha sem darhna distribution line thar pahnih siam leh cheithat hna thawh a ni. Rajiv Gandhi Grameen Vidyutikaran Yojana (RGGVY) kaltlangin thingtlang khaw 140 tihen a ni a, khaw 494-ah distribution transformer leh LT Line siam belh hna bakah BPL chhungkaw 25,123 hnenah a thlawnin eng pek an ni bawk.
Sawrkar Laipuia Power Ministry chuan thingtlanga kawlphetha pek hna tichak turin Rural Electricity Distribution Backbone (REDB) hnuaiah State chhunga hmun engemawzatah 33 kv sub-station bunna tur cheng vbc 73.37 a sanction a. NER Power System Improvement Project (NERPSIP) hnuaiah Sawrkar Laipui Power Ministry chuan Mizorama kawlphetha semdarhna hmanrua tihchangtlun nan cheng vbc 298.90 a dah a, PGCIL nen thawhhona thuthlung (MoU) ziahfel a ni tawh bawk.
5. Khua leh tui te hnena tui thianghlim in tur pek hi Sawrkar chuan a ngaipawimawh hle a. Public Health Engineering Department (PHED) chuan National Rural Drinking Water Programme (NRDWP) kaltlangin kum 2014-2015 chhung khan thingtlang khaw 52 bitukah khaw 51 hnenah hlawhtling takin tui in tur thianghlim an pe a, tihian Mizoram chhunga thingtlang khaw 734 te chu tui intlak a pe kim thei ta a ni. Special Plan Assistance (SPA) hnuaiah PHED chuan Mizoram hmun hrang hrangah cheng nuai 1,666 senna tur project pariat (8) a thawk mek a. Non Lapsable Central Pool of Resource (NLCPR) kaltlangin cheng nuai 10,778.40 senna tur water supply scheme sawm (10) a thawk mek bawk. 10% Lumpsum Grant sum hmangin khaw pali (4) - Saiha, Tlabung, Khawzawl leh Biate ah te tui pek tihchangtlunna tur sum cheng nuai 6,372.87 hmangin a thawk a, NEC sum cheng nuai 3,566.61 hmangin Water Supply Project pasarih (7) kalpui a ni bawk.
Mipui mimir thianghlimna inzirtirna beihpui Swachh Bharat Mission chu ram pumah October 2, 2014 khan bul tan a ni a. Hei hi kum 2019 ah tihhlawhtlin hman tum a ni. Thingtlang khaw 72 ah Solid and Liquid Waste Management Project bul tan a ni a, Mizorama District 8 zingah District 5 te chuan kumin chhung ngei hian inthiarna hmun mumal tak an neih hman beisei niin, daipawna inthiar (open defecation) awm tawhlohna State a puan a nih thuai theih nan ruahhmanna kalpui chhoh mek a ni.
6. Zirna hi hmasawnna tehfung pawimawh tak a nih avangin Sawrkar chuan tihchangtlun nan theihtawp a chhuah reng a. School zirlaite exam runpui HSLC leh HSSLC ah te pawh kum hmasa lam nena khaikhinin nasa takin hma kan sawn a, kum 2015 hian HSLC ah 68.92% kan thleng pha hial a ni. Mizorama a vawikhatna atan Department of School Education chuan kum 2014-2015 khan elementary school-a Class III pualin State Learning Achievement Survey (SLAS) a buatsaih a, chawhrualin language ah 79.3% leh Mathematics ah 72% an hmu a ni. Pilot Project atan Academic Session 2015-2016 chhung hian Primary School thlan chhuah 66 ah KG-I leh KG-II telh thar an ni. Tuna Academic Session hman mekah hian Class I-IV ah zirlaibu thar hman tan a ni bawk. Mizoram pumah a hmasa ber atan English Medium leh Mizo Medium School ah zirlaibu inang hman a ni a. Middle leh High School-a Hindi zirtirtu 1305 te chu rawih chhunzawm niin an hlawh tur cheng vbc 25.79 pawh Government of India atangin hmuh a ni tawh. Higher Secondary School atan Lecturer post 30 siam niin hnawh khah a ni tawh bawk. Sawrkar leh private school zirtirtu thawk lai training nei lo 2035 te chu training course chi hrang hrang pek an ni. Ram puma ziak leh chhiar thiam tamna ber State-a Mizoram siam tumin ziak leh chhiar inzirtirna beihpui Special Literacy Drive thlak a ni a, Lawngtlai, Mamit leh Lunglei district ah uar lehzuala kalpui an ni. Rashtrya Madhyamik Shiksha Abhiyan (RMSA) leh Sarva Shiksha Abhiyan (SSA) hnuaiah programme hrang hrang hlawhtling takin kalpui mek a ni bawk.
Champhai, Kolasib, Lawngtlai, Mamit, Saiha leh Serchhip ah Polytechnic thar din turin hmalak mek a ni a, Champhai leh Kolasib ah building sak zawh a ni tawh. Auditorium Annex Building, Lunglei Government College leh Government Zirtiri Residential Science College, Durtlang-a Main Building Block-I sak nan Special Plan Assistance hnuaiah sum ruahman a ni.
7. Mipui vantlang tlin tawka hriselna inenkawlna tha ruahman leh tihchangtlun chu Sawrkar ngaihpawimawh a ni a. Mizoram Institute of Medical Education & Research (MIMER) din nan State Referral Hospital, Falkawn chu cheng vbc 189 senga tihchangtlun tumin hmalak mek a ni a, academic session 2016-2017 chhung hian zirlai 100 nen bul tan theih beisei a ni. Mizoram Cancer Institute, Zemabawk ah cheng vbc 45 senga khum 100 awmna Cancer Hospital din turin Sawrkar chuan hma a la mek a, Sawrkar Laipui ah Detailed Project Report pawh thehluh tawh a ni. Cheng vbc 26.43 senga Champhai District Hospital tihchangtlun hna pawh thawh zawh a ni tawh bawk. Khum 200 awmna Hostel, Mizoram College of Nursing, Falkawn pawh sak mek a ni. Saiha District Hospital tihchangtlunna tur cheng nuai 1592.52 chu Ministry of DoNER chuan a rawn sanction a, hna tan thuai a ni ang. Lawngtlai ah khum 50 awmna Hospital sakna tur cheng nuai 1191.51 pawh Ministry of DoNER chuan Administrative Approval a pe tawh bawk a ni. Heng bakah hian JNM (District Hospital), Serchhip tihchangtlunna tur leh Civil Hospital, Lunglei-a Housing Complex sak nan Ministry of DoNER ah proposal thehluh a ni bawk. Thenzawl-ah khum 50 awmna AYUSH Hospital sak mek niin hna 85% chu zawh a ni tawh.
8. Chhungkaw harsa zualte tana chenna in siamsak leh an khawsak mamawh zualte phuhru turin Aizawl khawpui huam chhungah housing project 3 - Chite Lawipu Combine EWS Housing Project (Rs 3,403.43 lakhs), Rangvamual EWS Housing Project (Rs 3,075.14 lakhs) leh Durtlang EWS Housing Project (Rs 2,623.73 lakhs) te chu Jawaharlal Nehru National Urban Renewal Mission (JNNURM) hnuaia Basic Services to Urban Poor (BSUP) hmingin thawh mek a ni a, heng project te hi zawh tep niin chhungkua harsa 1,096 te tan chenna in a siamsak dawn a ni. Ministry of Urban Development and Ministry of Housing & Urban Poverty Alleviation, Government of India hnuaia hmarchhak puala sum ruahman 10% Lumpsum Grant Provision for North East India hmangin Urban Infrastructure Development Project leh Slum Area Development Project hrang hrang thawh chhoh mek a ni. He ruahmanna hnuaiah hian Aizawl khawpui leh khaw dangte huam tel an ni a, khaw dang notified towns 23 khuh teltir ve turin bawhzui mek a ni.
Special Plan Assistance hnuaiah scheme 2 - Aizawl Convention Centre (Rs 2500 lakhs) leh Armed Veng Community Centre (Rs 600 lakhs) sakna tur te chu pawm fel niin reilote ah hna tan tum a ni. Tunhnaia Prime Minister-in scheme a hawn thar 3 - Smart City Mission, Atal Mission for Rejuvenation and Urban Transformation (AMRUT) leh Housing for All (Urban) te pawh tihhlawhtlin a nih theih nan bultan chhoh mek a ni.
9. Thingtlang hmasawnna leh thingtlang retheihna chawikan / umbo hi Sawrkar ngaihpawimawh a ni reng a. Kum 2014-2015 chhung khan Mahatma Gandhi National Rural Employment Guarantee Scheme (MGNREGS) hnuaiah chhungkua 1,52,519 inhlawhna siamsak an ni a, tha nuai 6,156 sen a ni bawk. Kum 2014-2015 chhung khan Sawrkar Laipui chuan cheng nuai 9,941.23 min rawn pe a, ni 26 inhlawhna siam a ni bawk. Indira Awaaz Yojana (IAY) hnuaiah kum 2014-2015 chhung khan In 626 sak a ni bawk. Hmasawnna rualkhai taka kalpui a nih theih nan Lawngtlai leh Saiha District ah Backward Region Grant Fund (BRGF) kalpui mek a ni a, kum 2014-2015 atan cheng nuai 2,439 ruahman a ni. Mizoram State Rural Livelihood Mission (MzSRLM) chu Serchhip leh Kolasib District ah thawh mek a ni. Self Help Group (SHG) 467 din tawh niin 411 te chuan Revolving Fund Rs.10,000 theuh an dawng tawh bawk. Ramri hmuna chengte chawikanna Border Area Development Programme (BADP) hnuaiah hmasawnna hna 511 thawh nan cheng nuai 3,515.55 pek chhuah a ni.
10. Leilung hausakna, thing leh ramsa humhalh leh ramngaw tihpun chu Sawrkar ngaihpawimawh ber te zinga mi a ni a. National Afforestation Programme (NAP) hnuaiah Village Forest Development Committee kaltlangin hectare 57,000 hmunah thing phun a ni tawh a. Kum 2014-2015 chhung khan hectare 6,136 ah thing phun a ni bawk. Green Mizoram Programme hnuaiah thing tiak 2,80,000 sem a ni a. He programme hnuaiah hian, a bul tan kum 1999 atanga chhutin thing tiak nuai 36 phun/sem a ni tawh bawk. National Bamboo Mission (NBM) hnuaiah mau chin nan hectare 60,000 hman a ni tawh. Flagship Programme NLUP hnuaiah kum 2014-2015 chhung khan ram hectare 1,364 ah mau chin nan beneficiaries 882 hnenah tanpuina cheng nuai 120.88 sem an ni bawk.
Dampa Tiger Reserve leh Thorangtlang Wildlife Sanctuary inkara ramsa te veivahna tur atan tunhnai khan Environment & Forests Department chuan Lunglei District-a Thorangtlang Wildlife Sanctuary ram zauh hriattirna a chhuah a, hei hian 198 sq.km. a huam dawn a ni. Tunhnai khan 50 sq.km-a zau Kolasib District-a Pualrang Wildlife Sanctuary-a puanna thu chhuah a ni bawk. Mizoram thlai leh nungcha hlu tak humhalhna turin Biodiversity Management Committee (BMCs) 221 din a ni tawh a, People’s Biodiversity Registers (PBRs) 3 tihfel a ni tawh bawk.
11. Infiamna ruhrel tihchangtlun hi Sawrkar ngaihpawimawh pakhat a ni. Kawltheihuan, Aizawl ah Table Tennis Hall thar hawn a ni a, Chhangphut Playground, Champhai ah football khelhna phullem phah a ni tawh bawk. Ramhlun Sports Complex, Aizawlah Boxing Hall sak a ni a; Zotlang Sports Centre, Aizawl leh Mualpui Multipurpose Indoor Hall, Aizawl sak zawh a ni tawh. Heng bakah hian Mizoram hmun hrang hrangah project dang tam tak thawh lai mek a awm bawk. Kum 2014-2015 chhung khan Mizoram atangin infiammite’n khawvel huap inelna Taekwondo leh Muaythai-ah Bronze Medal pathum (3) an la a, ram pum huap inelna National level-ah Gold 50, Silver 55 leh Bronze Medal 76 zet an hlawh chhuak a ni. Mizoram Football Team chuan kumin 35th National Games Kerala a neihah khan Gold medal la in, National School Games-ah Hockey under-17 leh sub junior level-ah Mizoram aiawha tel te chuan Champion Trophy an dawng bawk. Infiammite tan Physiotherapy leh Rehabilitation Centre changkang leh tunlai tak siam mek a ni a. NCC Special Entry Scheme chhawr tangkaiin cadet pahnih chuan Indian Navy-ah Short Service Commissioned Officer an zawm a ni.
12. Buh leh thlai thar chhuah tipung turin loneitute hnenah buhfai chi tha leh thlahpawlh (hybrid rice seed), vaimim chi thlahpawlh leh be mu (pulse) chi tha semchhuah a ni a. RKVY, SMAM leh NFSM hnuaiah khawl chi hrang hrang- Power Tiller, Tractor mounted Rotavator, Water pumpset leh a dangte chu loneitute hnenah man tlawm zawkin pek an ni. Kum 2014-2015 chhungin WRC hmun chu hectare 1,246 zetin zauh a ni a, buhfai thar chhuah metric ton 1,685 zeta pungin metric ton 60,679 thar chhuah a ni. North East- a Oil Palm Mill awm chhun chu Bukvannei, Kolasib District-ah dah a ni a; he khawl hian darkar khatah metric ton 5 lai a her thei a ni. NLUP thawhhnihna hnuaiah beneficiary 7,577 hnenah trade hrang hrang pali atan sum cheng nuai 3,745.65 sem a ni bawk.
13. Horticulture Department chuan chhungkaw 24,097 hnenah Horticulture trade hrang hrang thawhna tur sum cheng vbc 295.568 a sem a. NLUP bakah Department chuan thei, thlai, hmuihmer bawlhhlo (spices) leh pangpar huan zauh belh turin Mission for North East and Himalayan States (HMNEH) sum hmangin hna a thawk a. Thar chhuah tipung turin Integrated Nutrient Management and Integrated Pest Management chu hectare 4,740-ah tangkai takin hman mek a ni. Serchhip District-a loneitute tanpui nan Lungleizau-ah Centre of Excellence siam a ni bawk.
14. Mizoramah loneih dan tha, kumhlun leh innghahna tlak kan neih theihna tura zirbingna “Study on Development and Management of Land and Water Resources for Sustainable Agriculture in Mizoram” behchhanin Japan International Cooperation Agency (JICA) chuan project 27 hmalakna tur duanlawk Masterplan a buatsaih chu thehluh a ni tawh a. Hemi hmang hian kum 2035-ah chuan Mizoramah eibar khamkhawp za zela 50 aia tam chu tharchhuah theih beisei a ni. Mizoram Sawrkar chuan he master plan hi “Road Map for Development of Agriculture and Irrigation Sector” Master Plan atan a pawm a ni. He Master Plan hi hlawhtling taka kalpui a nih theih nan Technical Cooperation Project atana rawtna ‘Capacity Development for Effective Irrigation and Agriculture Planning and Implementation for Minor Irrigation Scheme’ a siam chu Sawrkar Laipui Ministry of Finance chuan a pawm a, Japan Sawrkar pawmpuina nghah mek a ni. He project hmang hian Japan ram thiamna Mizoramah senglutin a senso zawng zawng chu Japan Sawrkarin a tum dawn a ni.
15. Sawrkar hmalakna pui ber NLUP kaltlangin AH&Vety Department chuan chhungkaw 37,047 hnenah ranvulh tanpuina a sem a. Ni khata litre 5000 dawng thei Bawnghnute sawngbawlna Indigenous Milk Product Plant pawh MULCO Complex, Zuangtui-ah dah a ni a. He khawl hian paneer, dahi, lassi leh flavoured milk a siam thei a ni.
Sericulture Department chuan pangang khawitute tan NLUP kaltlangin chhungkaw 2195 hnenah tanpuina a pe a. Soil & Water Conservation Department hnuaiah 2014-2015 chhungin NLUP kaltlangin hmunphiah chingtute’n metric ton 2,958 zet an tharchhuak a, an sum thawhchhuah chu cheng nuai 1,479 a tling a ni. Intensive Fish Culture hmangin hectare 1,293.5 ah Fisheries Department chuan hma thar a la a, tlangram loneiha eizawng thin chhungkaw 2,578 tan intunnunna a siamsak a ni.
16. Myanmar ramri-a sumdawnna-in hma a sawn zel theih nan ni 25.3.2015 khan Sawrkar Laipuia Commerce and Industry Minister of State (Independent charge) Pi Nirmala Sitharaman chuan Zokhawtharah insumdawntawnna hmun Land Customs Station a hawng a. Kawrpuichhuahah Integrated Check Post sak hna chu chak taka thawh mek niin hei hian Bangladesh leh Mizoram insumdawntawnna kawngah nasa takin a tihchangtlun beisei a ni.
17. Social Welfare Department chuan rualbanlote chhawmdawlna tur programme hrang hrang bakah hmeithai rethei, tar leh chaklo zawkte chhawmdawl hna te, hmeichhia leh naupangte tan hmasawnna programme te kalpuiin nunphung pangngaia khawsa theilo te chawikanna tur socio-economic rehabilitation programme te a kalpui a. Ruihtheihthil, hmeichhia leh naupang rukbo dona leh naupang kumtlinglo sual kawng zawh mekte chhanchhuah kawngah hma a la bawk. Mihring mamawh protein leh micro-nutrients tlachhamte tan Nutrition Programme a kalpui bawk.
Tun hnai khan Serchhipah Sawrkar Laipui Ministry of Tribal Affairs atanga sum hmuh cheng vbc 12 sengin Eklavya Model Residential School (EMRS) hawn a ni a. Saiha, Lawngtlai leh Chawngte a EMRS hawnna tur sum hman phalna pawh Ministry hian a pe tawh a, sak tan thuai tum a ni. Pukpui (Lunglei), Kolasib Govt. College, KVM High School (Aizawl), Thenzawl High School, Lungleng, Mualpui leh Durtlangah te Scheduled Tribe Girls Hostel sak mek a ni. Saiha, Lunglei leh Mamit ah ST Girls Hostel sakna tur sum hman phalna hmuh a ni tawh bawk.
18. Food, Civil Supplies and Consumer Affairs Department chuan ei leh bara mipui an phan loh nan rualkhai takin buhfai a sem a. Ration card Computerization hna End to End Computerization of Targeted Public Distribution System (TPDS) pawh thawh zawh a ni ta. Hrisel leh thianghlim taka eibar tam zawk vawn that a nih theih nan cheng vbc 9.60 sengin Kudam thar 17 sak hna chu thawh zawh tep a ni tawh a. Kudam thar 27 dang sakna tur cheng vbc 32.68 chu NABARD atangin puk a ni. Hemi hmang hian buhfai leh eitur dang metric ton 8000 zet vawn thatna tur neih belh a ni ang.
19. Zuangtui Industrial Area ah Industrial Plot unit 25 leh Export Promotion Industrial Part, Lengte-ah unit 10 dang siam a ni a. Mizoram Ispat Industry leh Chinzah Industry, Lengte-ah sumchang thei thil siamchhuah niin ei leh in sawngbawlna food processing unit 3 te pawhin an siamchhuah thil te an hralh tan thei tep a ni. Mizoram Handloom Export Facilitation Hub sakna tur Thenzawlah lungphum phum a ni tawh a. Weavers’ Service Center pawh ni 3.7.2015 khan Union Textiles Minister of State (Independent charge) Pu Santosh Kumar Gangwar chuan a hawng a. WSC awmhmun nghet atan Handloom Complex, Luangmual chu thlanfel a ni tawh bawk.
20. MLTP Act, 1995 thlaktu The Mizoram Liqour (Control & Prohibition) Act, 2014 chu July 10, 2014 khan Mizoram Legislative Assembly chuan a pass a. January 15, 2015-ah he dan hi hman tan a ni. Sawrkar kum 2014-2015 chhung khan Sawrkara sum chhunluh tura beisei cheng nuai 347 chu khumin cheng 4,58,93,981 zet chhunluh a ni.
21. Local Administration Department chuan XIII Finance Commission atanga thingtlang khaw hrang hrang vantlang mamawh ruhrel siamna tur sum hmuh General Basic Grant cheng nuai 1,284 sem dan tur ruahmanna a siam mek bawk.
22. Kuttlinglova sum lakluh nuaibo nan theihtawp chhuahin Sawrkar chuan hma a la chhunzawm zel a, Mizoram mipui tana sawrkar tha siam tura hmalakna pawimawh ber te zinga mi a ni. Khawtlang, tlawmngai pawl leh mithiamte rawn chungin Central Lokpal leh Lokayukta Act zulzuia duan Lokayukta Bill, 2014 chu Mizoram Legislative Assembly chuan a lo pass tawh a. The Mizoram Lokayukta Rules pawh peihfel tawh niin heta tan hian Selection Committee pawh din a ni tawh. The Mizoram Compulsory Registration of Marriages (Amendment) Bill, 2015 chu Mizoram Legislative Assembly in a pass a; he danah hian Marriage Certificate leh registration thiah (cancel) theihna leh nupa inthen theihna a tel a ni. Mizo hnam chindan leh nunphung mila duan The Mizo Marriage, Divorce and Inheritance of Property Bill, 2014 chu pass a ni a. He dan thar chhinchhiahtlak tak hian Mizo khawtlang nunah mipa leh hmeichhia intluktlanna a thlen theih ngei beisei a ni.
23. Tourism Department chuan Mizoram hi zinmite tana tlawh chakawm taka siam tur leh India ram chauh ni lo khawvel huap Tourism Map-a hmun pawimawh tak a luah theih nan theihtawp a chhuah a. Mizoram chuan khuanu kutchhuak malsawmna dawngin a hmunhma, tlang leh luite’n a zir em avangin Adventure Tourism, Rural Tourism leh Eco-Tourism lamah kawl a eng hle a, Department pawhin a dah pawimawh hle a ni.
24. Tunlai thiamna chhuak thar zinga pawimawh em em, computer thiamna hmangin Sawrkar chuan ram pum hi Digital India hmalakna hmangin thlak danglam dawrh a tum a. Langtlang sawrkar siamna kawngah te, mipui mimir leh sawrkar indawrna kawngah te pawh awlsamna nasa tak a siam dawn a ni. Mizoramah pawh BharatNet programme hmangin khawpui chhung chauh ni lo thingtlang khua thlengin internet chak chi Broadband hmanga thlunzawm vek tumin Sawrkar chuan hma a la a ni.
25. NEIGHRIMS, Shillong bul lawkah Mizoram House sakna tur ram neih a ni tawh a, damlo inentir tura kalte tan a tangkai hle tura ngaih a ni. Rajarhat, New Town, Kolkata-a Mizoram House thar hawn tak pawh inentir tura damlo kalte tan a tangkai hle dawn a. Karnataka Sawrkar chuan Bangalore-a Mizoram House sakna tur ram tha tak min pe tawh bawk a ni.
Vawiinah hian Mizoram Sawrkar hmalakna thlawp a, Sawrkara rinna leh beiseina an la nghah tlat avangin tlawmngai pawl te, Kohhranho te, mipui leh chanchinthar thehdarhtute hnenah tihtakzetin lawmthu ka sawi a. He ni puala parade contingent te leh zirlaite bakah he ni lawmnaa tel zawng zawng chungah lawmthu ka sawi a ni.
He ni ropui takah hian hnam inpumkhatna leh inunauna vawng nung zel turin theihtawp chhuah tlang i la. Kan State leh ramin hma a sawn a, kan ram Danpuia innghat tlat chunga kan tu leh fate luah tur ram nuam leh chhenfakawm kan hnutchhiah theihna turin i inhlan thar theuh ang u.
JAI HIND
