No.4861/2020-2021

Dated Khawzawl, the 8th September, 2020: Vawiin chawhma khan Shyama Prasad Mukherji Rurban Mission (SPMRM) kaltlangin Khawzawl Rurban Cluster khaw 9 - Arro, Tualpui, Chawngtlai, Neihdawn, Hmuncheng, Vankal, Ngaizawl, Khualen leh Tualte-a Khuaikhawitu mi 48 te hnenah Khuaibawm 336 semchhuah a ni.

Dr.Saithangpuia, BDO Khawzawl chuan fuihna thusawiin, Khuaikhawitute chu thahnemngai taka Sawrkar Scheme kal lai mek hlawhtlinna tura hmala tur leh Sawrkar atanga khuaibawm semte tangkai taka hmang theuh turin a chah a. BDO chuan Khuaikhawitute tana ruahmanna duante sawiin, khawizu sawngbawlna tura hmalak mek anih dante, bottling & packaging leh labelling awm thlapa Khawzawl Cluster khawizu tharchhuahte khawpui lian zawk thlenga hralh chhuah theih tura ruahmanna kalpui mek a nih thute a sawi a. Khuaibawm semchhuah chuan Khuaikhawitute harsatna tam tak phuhruin hlawk zawka khawizu an thar theihna kawngah a puih ngei a beisei thu a sawi bawk.

Khuaibawm semna programme Khawzawl BDO Office-a neih hi Pi Lalneihpuii GS-in a kaihruai a, Pi Juniper Lalengzami Technical Assistant-in Technical report pein khuaibawm siam anih dan leh khuaibawm nihphungte a sawifiah a. Khuaikhawi Association aiawh atangin thusawi ngaihthlak a ni bawk.