2529/2022-2023
Date 2.11.2022 : Vawiin khan Sport Minister leh Aizawl East-II bialtu MLA ni bawk Pu Robert Romawia Royte hovin Home department hotu te, Police Headquarters hotu te, MSSC official te leh Armed Veng South khawtlang hruaituten Armed Veng South Community Hall zauhna hmunhma an en ho a.

Armed Veng South Community Hall hi Aizawl East-II chhunga bial huap thil pawimawh tihna hmun remchang a nih avang leh Armed Veng South khawtlang tan changtlung leh mipui tam zawk lenna tur leh infiamna atana a tangkai zawk nan a dungtluan leh a vang lamah feet 15 veka tihlena a chung tisanga Rs 200 lakh senga extend tur a ni a. Police ram nen tlem insiamrem a ngaih avangin Home Commissioner leh hotu dangte nen en ho a ni a. Tender hmanga hnathawktu tura thlan Excel Construction-in hna an thawh tan nghal theih tura insiamrem fel nghal a ni.

Tourism Minister Pu Robert Romawia Royte chuan a bial Aizawl East-II chhunga mihring tamna, Veng lian tak, Armed Veng South-in Hall lian an nei tur chu lawmpuiin CM zahawm tak leh Home Minister zahawm tak leh Home department chungah phal taka an ram an sahthlak avanga lawmawm a tih thu a sawi a. A satu tur Contractor te pawh hna uluk leh chak taka thawk turin a hrilh nghal a, Armed Veng South Local Council te leh YMA te pawh neitu rilru pua hnathawktu te lo enpui thin turin a chah nghal bawk.

Pu H.Lalengmawia, IAS, Home Commissioner pawhin thusawiin, thalaite hmakhaw ngaitu, ram tana Minister chak leh bial mipuite tana thiltha ngaihtuahtu Aizawl East-II bialin an nei a lawmpui thu a sawi a. Sorkarin Sorkar hall tana a ram a sahthlak chungchangah a tih tur a ti zel a, hnathawktu turte pawhin chak taka an hna thawk tan nghal turin a hrilh bawk. Community Hall zauhna tura Police Quarters pakhat sak that ngai chu Sports department lamin an sak thatsak dawn a ni.

Armed Veng South Local Council Chairman Pu K.Lalthlantuma pawhin thusawiin Armed Veng South mipuiin an nghahhlelh em em an Hall tihlen nana ram tihfel a ni ta chu lawmawm a tih thu a sawi a, thuneitute chungah mipui aiawhin lawmthu a sawi a ni.