Aizawl, 8th March, 2021 : Vawiin khan MFA Ground (FIFA Forward Project), Sairang Dinthar-a mi chu Pu Robert Romawia Royte, Sport Minister-in a hawng.

Pu Robert Romawia Royte chuan FIFA-in Mizorama Football field tha tak a siam avangin lawmthu a sawi a. Sports Department-in kalphung mumal a neih theihna tura Sports Policy, 2019 siam te, Sports - Industries status-a dah a nih thu te, Infiamnaa mi bikte tana Sorkar hna Group B, C leh D te direct-a lak turah zaa panga (5%) dah a nih thu te a sawi.

 Heng bakah hian Mizoram Sorkar chuan Football Field tha la awm lohna District Hqrs. Mamit leh District thar 3, Saitual, Khawzawl leh Hnahthial tiamin Football fields 24 siam tharin phullem phah tum a nih thu a sawi a. Sorkar laipui atangin Khelo India State Centre of Exellence din tura sanction dawn a nih tawh thu leh Sorkarin sports discipline hrang hranga hmasawnna a ngaih pawimawh thu a sawi.      

Sports Minister chuan tunhnaia professional boxing-LPS Fight Night-a Lalrinsanga Tlau World Champion a ni thei leh Mizo Boxers dangten chakna an chang vek chu lawmawm a tih thu a sawi a. Sports discipline hrang hrangah Association hruaitu ten thahnemngai taka tan an lak avangin lawmthu a hrilh a, mumal lehzuala țan lak a tul thu sawiin thalaite hmasawnna ngaihtuah tlang turin a sawm a ni.

Mizoram Football Association Khelmual hi kum 2016 August thla atangin a laih zauh hna thawh tan a ni a.  Chumi hnuah FIFA contractor Edel Grass, Netherland leh Acosa Sports, Mumbai te tang kawpin khelmual siam leh chhuat phah leh thil tul dangte an thawk dun a, tichuan February 18, 2021-ah hnathawh zawh a ni. He MFA khelmual hi FIFA pawmpui khelmual puitling, a line rin chin (playing area) 105 x 68 metres, Grass phah chin zau zawng 111 x 74 metres bakah a pawnah metre khata zau kal kualna dah vek a ni.

MFA Ground thar hawnna ah hian bialtu MLA Pu Zothantluanga pawh a tel a. MFA President Pu Lal Thanzara’n inlawmna thu sawiin, Rev. Dr. C.Lalhlira, Moderator, Mizoram Synod-in hunserh leh Khelmual Pathian hnena hlanna hun a hmang a. Pu Lalnghinglova Hmar, Honorary Secretary, MFA-in report pein, Prince Rufus, South Asia Development Officer, FIFA pawhin thu a sawi a. Sports & Youth Services Department Director Pu Lalsangliana, MSSC hotute, Sports discipline hrang hrang aiawhte bakah Sairang khawtlang hruaitu leh NGOs hruaitute leh sawm bik mi thahnem tak an tel a ni.