3647/2022-2023
Date 21.2.2023 : Vawiin khan Armed Veng South Branch Mizoram Upa Pawl din champha vawi 35-na lawmna inkhawmah Khuallian niin Aizawl East-II bialtu leh Minister Pu Robert Romawia Royte-in Armed Veng South Community Hall-ah hun a hmanpui.

Bialtu MLA Pu Robert Romawia Royte chuan MUP member te chibai bukin duhsakna a hlan a. Kan ram, khawtlang leh chhungkaw tana kum upa, MUP member te an hlutzia leh an ngaihsanawmzia a sawi a. Covid-19 hripui leng avanga duh anga sorkar leh amah pawh a chet theih loh thusawiin chuti chung pawha MUP te tawiawmna tha tak a dawng thin chu lawmawm a tih thu a sawi.Kum upaten an tute hnenah an nu leh pate thuawih tura fuih thin turin a chah a,Bible-in a sawi angin nu leh pate thu awiha zah thiam tura tunlai thangthar inzirtir uar zel turin kal khawmte a chah a ni.

Khuallian Pu Robert Romawia Royte chuan tunlaia thalaite zinga ruihhlo a hluar lutuk pawi a tih thu leh a vei thu a sawi a, tu mah inthlahdah lova ruihhlo dona kawnga kan tanruala tha pui kan thawh a hun tawh tak zet a ni tiin thawhpui turin a inpeih reng tih a sawi bawk.Tawngataina leh tha leh zung senga tan la zel turin a sawm a ni. Aizawl East-II bialtu MLA Pu Robert Romawia chuan Bial mipuite chu inthlahrung hauh lova ama hnena an mamawhna thlen thin turin a ngen a. Armed Veng South MUP Rising Day lawmpui nan Rs 50,000/- a pe a, kalkhawm zinga MUP member upa ber Pi Rallianchhingi kum 97 hnenah Chawimawinan Rs 3000 pein a dawttu Pu Chalmawia kum 92 hnenah Rs 2000/- a pe bawk.

Armed Veng South Branch M.U.P-ah hian member 342 an awm mek a, kum 2022 chhung khan member 16 an boral a, damlo mi 21 an inkan bawk.

An bialtu MLA leh Minister Pu Robert Romawia Royte te chhungkuain Armed Veng South Branch MUP tana an thil tihsak tam tak zingah Hrlicopter-a Aizawl khawpui an fantir te, Tuirial leh Serlui Hydel Project an tlawh te, Thenzawl area an tlawh te, blanket, towel, lukhum leh dinner set an pe te leh MLA Fund hmanga MUP building a saksak avanga an lawmthu an sawi a ni.

He inkhawm hi Pu C.Lalhrilkima, President, MUP, Armed Veng South Branch-in a kaihruai a, Pu James Zoleta, Secretary-in hunserh hmangin report a pe a, Armed Veng South khawtlang hruaitu te, Local Council, YMA, MHIP leh NGO dangten an tawiawm a ni.