Parliamentary Secretary Pu Joseph Lalhimpuia chuan Champhai Chhangphut khelmuala Coca Cola Cup 2014-15 atana Sub Junior National Football Championship for North East Zone Qualifying Round khelh chu vawiin khan a kharna hun hmanpuiin, inkhelha tithate hnenah trophy leh medal a hlan bawk.

Parliamentary Secretary chuan inkhelte chu theitawp chhuaha hmasawn zel turin a duhsak thu a sawi a. Chutihrualin sports an khelh avanga zirlai thlahthlam lo turin leh nun uluk turin a chah a. Ruihthihthil leh zuk leh hmuam a inhmanhnawih chuan talent nei tha tak pawh mi hmantlaklohah a chhuak dawn a ni, a ti. Pu Joseph Lalhimpuia chuan Sorkar hmalakna kaltlangin infiamna lamah thalaiten hma an sawn nasat thu leh khelmual hmunhma tha zawk siam a nih chu mipuiin kan tangkaipui hle a ni tiin, Champhai chu a chhawr ber te zing a mi a nih thu a sawi a ni.

Parliamentary Secretary hi Education Department-a official ten tawiawm in, chawhma lam khan Champhai DEO and DPC, RMSA office bakah SSA District Project Office leh SDEO Office-te tlawhin thawktute nen inkawmna hun a nei a ni.

Vawiin final match-ah hian Mizoram leh Meghalaya team-te intum in, Mizoram chu an 3-0 in an chak a. Kharna hun hi Pu Lalnunmawia, Honorary Vice President, MFA chuan kaihruaiin, Pu Lalnghinglova Hmar, Honorary Secretary, MFA bakah Coca Cola Company Manager ten thu an sawi bawk a ni.