2303/2026-2027

Dated Aizawl, the 22nd September, 2026: Kum 2027-a neih tur 39th National Games-ah Mizoram chuan Weightlifting discipline thleng tura sawmna a dawn avangin vawiin khan Sports & Youth Services Minister Pu Lalnghinglova Hmar hovin a Office Chamber-ah mi pawimawhten an sawiho.

39th National Games hi Meghalaya-in nakum February - March, 2027 chhung hian a thleng dawn a. He Games-ah hian hmarchhak state hrang hrangte chu discipline pakhat theuh co-host tura beisei niin Mizoram chuan Weightlifting discipline thleng tura sawmna a dawng a; hemi chungchangah hian vawiin khan Mizoram Sports Minister chuan Meghalaya Sports Minister leh Northeast Sports hotute be pawp nghalin Mizoramin a thleng dawn a nih chuan sum inruahman dan tur chungchangte leh a hmunhma tur te an sawiho a ni. Ministry lam atanga thu chiang zawk ngaihchan mek niin tun dinhmunah thutlukna felfai siam theih a la ni rih lo a, mumal zawka inbiakna leh inbuatsaihna kalpui chhoh zel tum a ni.

Minister Pu Lalnghinglova Hmar chuan hemi atana Mizoram Weightlifting Association te inbuatsaihna leh thahnemngaihnaah lawmthu sawiin Mizo thalaite tan kawng zau zawk a inhawn zel theih nan theihtawpa hmalak zel a nih tur thu a sawi a ni.

Vawiin thutkhawmah hian Sports & Youth Services department hotute, Mizoram State Sports Council hotute, Mizoram Weighlifitng Association hruaitute leh a kaihhnawih department hrang hrang hotute an tel a ni.