2933/2024-2025

Dated Aizawl: the 12th of November, 2024: Vawiin chawhnu dar 1:00 khan Pu Lalnghinglova Hmar, Minister of State, Sports & Youth Services Department hovin a office chamber-ah Beijing, China-a taekwondo leh Bachelor of Arts (BA) zir tura thlan mi pahnih - Vanlalhmangaihzuali d/o Lalrinawma, Kolasib New Diakkawn leh Joseph Vanlalpeka s/o Lalremruata (L), Armed Veng South te fuihna leh thlahna hun chu hman a ni.

Sports Minister Pu Lalnghinglova Hmar chuan thlahna hunah hian thu sawiin, “Mizoram sports in hma a sawn zel theihna’n sports association hruaitute leh infiammite’n National level leh International level thleng phaka ngaihtuahna kan sen a tul” a ti a. Mizoram Amateur Taekwondo Association (MATA) hruaitute hmathlir leh hmalakna hrang hrangte lawmawm a tih thu sawiin, Taekwondo chu international level-a medal hnaih theihna sports discipline zingah a tel tih a tarlang a. Pu Lalnghinglova Hmar chuan Vanlalhmangaihzuali leh Joseph Vanlalpeka te chu an University leh China-ah Mizo aiawhtu leh Mizoram hmel lanna an nih dawn avangin, An zirna leh nitin nunphungah Mizo nun zemawi vawng zel turin a chah a. Tawng, hriselna leh zirna chungchangah harsatna an tawh chang pawhin an kal chhan hre reng a, hlawhtling ngei tura thawkrim turin a fuih nghal bawk a ni.

Vawiina thlahna hunah hian Mizoram Amateur Taekwondo Association hruaitute’n report pe in fuihna thu an sawi a, Beijing, China-a kal turte chu Mizoram tana kal an nih hre reng a, theihtawp chhuah turin an chah a. Hmathlir thui tak nena Mizoram Sports Conclave buatsaih a, Mizo infiammite tana kawng hawnsaktu Sports Minister chungah lawmthu an sawi bawk a ni.

Vanlalhmangaihzuali leh Joseph Vanlalpeka te zirna tur hi Capital University of Physical Education & Sports, Beijing, China-ah niin, foreign sponsorship quota a luttur an ni a. Kumin June ni 13-14 chhunga Aizawl-a Mizoram Sports Conclave buatsaih a nih tum a lo kal, Grand Master Kim Hee do leh Grand Master Lee Jeong Hee te’n Mizoram Olympic 2036 Vision a hlawhtlinna turin he sponsorship hi an lo buaipui a ni.

He Sports University-ah sponsorship hmuh thu hriat vel leh hian MATA chuan thuchhuah siam nghalin, diltu eng emaw zat atangin Grand Master ten tehfung chi hrang hrang hmangin an lo endik a. Endikna hrang hrang paltlang hnuah India atangin Vanlalhmangaihi leh Joseph Vanlalpeka te chu zir thei tura thlan an ni ta a ni. University-ah hian China zirlaite kalphung ang thovin kum khat chhung chu China tawng (Mandarin) zir pahin, Taekwondo zirtirna an kalpui ang a. Kum khat hnuah hian Bachelor of Arts an zir chhunzawm nghal dawn a ni.

India quota-a tling thei Mizo Taekwondo player pahnihte hi MATA player tha tak ve ve an ni a. Kolasib New Diakkawn nula Vanlalhmangaihzuali hian Kolasib Taekwondo Club atangin Taekwondo a rawn zirchhuak a, Goa National Games leh National Senior Championship hnuhnung berah khan Gold Medal a la ve ve a ni. Armed Veng South tlangval Joseph Vanlalpekhlua hi National Junior Champion lai niin Mizoram tan vawi tam tak medal lo la tawhtu a ni a. Exodus School Taekwondo Club-ah Taekwondo a zir mek a ni. Sports Minister hian Vanlalhmangaihzuali leh Joseph-a te hi pawisa fai a pai a ni.

Vawiin chawhnu vek khan Dr. Vanlalthlana, Minister, School Education pawhin Beijing-a taekwondo zir turte lawmpuina leh fuihna neiin thilpek a hlan bawk a. Inthlahna hunah hian MATA hruaitute bakah player chhungte’n infiammite an tawiawm a ni.