Vawiin chawhma khan Sports and Youth Services (SYS)  Minister Pu Zodintluanga pisa-ah 21st International Boxing Simon Trestin Memorial Tournament, Odessa , Ukraine-a neih taka 52kgs category inelna a Gold Medal latu - Laldinmawia, Tuipui khua chawimawina hun hman a ni a. He hunah hian Sports and Youth Services (SYS) Department changtu Parliamentary Secretary Pu Hmingdailova Khiangte leh SYS Secretary Pu H.L. Rochungnunga, IAS ten an hmanpui a ni. 

Sports Minister Pu Zodintluanga chuan  chawimawina hun neih a ni chu lawmawm a tih thu a sawi a. Khawvel pum huapa Gold Medal lak hi thil namai lo tak anih thu sawiin he hlawhtlinna hi entawntlak tak a ni, a ti a. Sports lamah Mizote kan thang nasa tiin remchanna la a, hmang tangkai turin thalaite a fuih a. Gold medal lak hi Mizo thalaite tan bul tanna mai a ni tiin hei aia nasa lehzuala bei turin leh taihmakna leh insumtheihna nei turin a chah a. Sports-ah chuan tumpuite (opponent) chakna leh chaklohna zirchian a tul a ni tiin he thil hriatna hian thui takin infiammite a pui a ni, a ti a. Laldinmawia chu a kal zelna turah Sports Minister chuan duhsakna a hlan nghal bawk a ni. 

21st International Boxing Simon Trestin Memorial Tournament hi  17th-23rd July 2017 khan Odessa, Ukraine a neih a ni a. Ram hrang hrang 14 telin India atangin mi 5 an tel a ni. 

Chawimawina hun hi Mizoram State Sports Council (MSSC) Secretary Pu C. Laltlanthanga chuan kaihruaiin Gold Medalist Laldinmawia chuan tournament report a pe a. Minister chuan Laldinmawia hnenah  Kit Allowance (Rs. 10,000) a hlan nghal a.  Mizoram State Sports Council (MSSC) leh Mizoram State Boxing Association (MSBA)-te an tel bawk a ni. 

Laldinmawia hlawhtlinna lo chan tawhte chu a hnuaia tarlan ang hi a ni:

1)    Gold Medal -  23rd Sub-Junior (Men) National Boxing Championship, Golaghat , Assam (February 2008) 

2)    Gold Medal – 24th Sub-Junior (Men) National Boxing Championship, Gangtok, Sikkim (December 2008) 

3)    Gold Medal – 25th Sub-Junior & Junior (Men) National Boxing Championship, Aurangabad, Maharashtra (December 2009) 

4)    Silver Medal – 1st Sub-Junior (Men) National Boxing Championship, Kolkata, West Bengal (2010) 

5)    Gold Medal & Best Boxer – 27th Junior (Men) National Boxing Championship, Pune, Maharashtra (2011) 

6)    Gold Medal – XXIV North East Games, Aizawl, Mizoram(2012) 

7)    Gold Medal – 4th Junior & Sub- Junior (Men) National Boxing Championship, Akola, Maharashtra (2012) 

8)    Bronze Medal – 1st Elite Senior (Men) National Boxing Championship, Guwahati, Assam (2016)