Vawiin khan Sports Minister Pu Robert Romawia Royte kaihhruaina hnuaia meeting hmasa ber ni turin Mizoram Sports Council (MSSC) General Body meeting chu MSSC Conference Hall, Hawla Indoor Stadium-ah neih a ni.

Sports Minister chuan member-te finchhuahna leh tawiawmna a mamawh thu sawiin kalkhawmte lawmna thu a sawi a. Mizoramah sports lama hmasawnna a thleng chho zel a, kan hruaitu hmasate leh infiammite, kan ram hming tithatute an chhuanawm hle a ni, a ti a. Olympics hmangin ram hrang hrang khawvel pum huapin kan intihsiak thin a, India ram pum huapin National Games-ah kan intihsiak leh a, Khelo Youth Games kan nei leh a, hengah hian mizo hming tithatu kan nei chho zel a, a lawmawm hle a ni tiin heng infiammi chhuanawm tak tak te hi sawrkar lam atang pawhin lawmpuina (incentives) pek an ni thin a ni, a ti a. Intihsiakna reng rengah level sang inelnaa tel thei ringawt pawh an fakawm thu sawiin Qualifying level ngaih pawimawh a tul thu a tarlang a. Olympics leh National Games-ah mi tam zawk kan tel theih nana kawng pakhat chu Mizoram State Games neih a ni a, hemi neih hma hian District level-a intihsiakna pawh a awm thei a ni tiin ruahmanna siam tum a ni, a ti a. Hei hian infiamna chi hrang hrangah rahbi thar min kaitir a beiseiawm hle a ni, a ti a. Infiamna lama hmasawnna ruhrel kan neihte hi tun aia changtlung leh lian zawk, intihsiakna lian zawk neih theihna tur kan mamawh a ni, tiin tin zawn neia hmasawnna ruhrel kan neih a ngai a ni, a ti a. Infiammi chauh ni lovin mipuite pawh kan insawizawi that a tul a, hemi pual hian ‘Fitness Day’ nei tura ruahmanna siam a ni dawn a ni, a ti.

Meeting-ah hian kum tina MSSC in association hrang hrang hnena an pekchhuah thin, Annual programme form-a dahbelh tur sawi ho a ni a. MSSC hnuaia Hall leh field hman man tihdanglam chungchang rel a ni bawk. Hei hian Ramhlun Indoor Stadium, Ramhlun Sports Complex, Hawla Indoor Stadium, Rajiv Gandhi Stadium leh hmun dang hrang hrang a huam tel a ni.

Meeting-ah hian MSSC hruaitu leh member-te an tel kim hle a ni.