Headquarters 23 Sector Assam Rifles bultumin vawiin khan Loch Hall, 46 Assam Rifles hmunpui ah  tun hnaia neih NES Under-19 Women Football Championship a champion Mizoram Team te chawimawi hun ‘Felicitation Programme’ buatsaih a ni a. He hun hi Sports Minister Pu Robert Romawia Royte’n a hmanpui a. Mizoram Football Association (MFA) hruaitute pawh he hunah hian an tel bawk a ni.

Sports Minister Pu Robert Romawia Royte chuan Mizoram Hmeichhe U-19 Team in NES U-19 Championship a, champion an ni chu a lawmpuiin thu sawiin he hnehna hi Sawrkar ta emaw, a buatsaihtu leh buaipuitu Assam Rifles ta  emaw, MFA ta emaw a ni lova, Mizoram mipui zawng zawng ta a ni tiin team te chu Mizoram mipui chhuanvawr an nih thu a sawi. Mizoram Hmeichhe team in Nagaland Hmeichhe team, India aiawh tunhnaia international level a tel te, an hneh hian kan hmeichhe footballer te an that zia a tih lan thu a sawi lang a. MFA in football thanna atan an hmalakna te chu Sawrkar ang pawhin a thei ang angin belhchaha, tiphuia , tichak turin Sawrkar in hma a lak zel tur thu a sawi a, Sawrkar leh MFA thawhona tha tak chu chhunzawm zela, tichak turin MFA hruaitute a sawm bawk a ni.

Pu Robert Romawia Royte chuan football chu hnam impumkhatna leh a tihchakna hmanraw tha tak anih dan sawiin football avangin Hmarchhak state leh India hmun dangte kan in pawh tha leh zual a, inuanau boruak tha zawk siamin hnam inpumkhatna a tichak a, football thil tih theihna hi a ropui a, ngaihnep theih a ni lo tih a sawi. Sawrkar chuan football rualin sports discipline dangte tun aia nasa leh zawka hmasawn tir a  duh avangin Mizoram in ala neih ngai lo Mizoram Sports Policy chu buaipui mek a nih tih sawiin taekwondo, basketball, volleyball leh sports discipline te than dan chu a lawmawm a, sports association te tichak turin Sawrkarin ngaihtuahna a sen mek a, inrelbawlna tha zawka kan neih thei nan Sports Minister a nih ang pawhin theihtawp a chhuah tur thu a sawilang a. International level match thleng thei turin Rajiv Gandhi Sports Stadium ah Flood Lighting tha tak a awm thei an hma lak mek a nih thu te, Aizawl khawpuia football field dang 4/5 vel siamna tur hmun dap mek a nih thu te, Zembawk field atan grass phahna tur sanction a awm tawh thu te leh Khawzawl field ah pawh grass phah turin ruahmanna siam mek a nih thu te a sawi lang bawk a ni.

Sports Minister chuan Assam Rifles in Football leh Mizo thalaite hmasawnna atana an inpekna chu fawkawm tiin he thawhona tha hi chhunzawm zela, Mizoram thalaite hmasawnna leh an talen te phochhuahna kawnga theihtawp chhuahpui zel turin a sawm bawk a ni.

He hunah hian HQ 23 Sector Assam Rifles hotupa, Brig. Vinod S. Leh MFA President Pu Lal Thanzara te pawhin thusawiin infiamite an fuih a ni. U-19 Team a tel zawngte hi Assam Rifles hian thilpek an hlan bawk a ni.

North East States U-19 Girls Football Championship hi Directorate General Assam Rifles (DGAR) chuan Diphu leh Kohima ah te July ni 17 leh July ni 21 inkar khan a buatsaih a, he Championship Mizoram team an champion a ni.