2292/2026-2027

Dated Aizawl the 21st September, 2026 : Vawiin tlai khan Sports Minister Pu Lalnghinglova Hmar chuan September 6-a Cameroon International Cup 2026-a Gold medal leh, Nigeria-a Lagos International Badminton Classics (August 29)-a Silver medal latu H. Lalṭhazuala, Chanmari West lawmpuina hun chu MINECO-a a office chamber-ah a hmanpui.

Sports Minister Pu Lalnghinglova Hmar chuan, "Vawiinah hetiang hun kan thleng thei hi lawmawm ka ti hle a, badminton-a kan hmasawnnate kan han hmuhin rilruin hlawhtlinna hmuh hun kan inbeisei ru ve reng a, nimahsela kan beisei aia hmaa international medal kan hlawhchhuak thei hi a lawmawm tak zet a ni. Rim taka beitu - nu leh pate tan a lawmawm lehzual ang" a ti a. "Vawiin chu thingpui inhona a ni a, Incentive Cash Award sem hunah sawrkar atanga lawmpuina pawisa fai a dawng ang," tiin a sawi a, mimalin lawmpuina sum fai a hlan bawk. 

Sports Minister chuan Ṭhazuala chu, "Zinkawng zawh ṭan chauh a la ni a, inelna sang zawk leh hlawhtlinna lian zawk chang turin kawng zawh tur a la thui a, chu lam chu hawi tlat ang che," tiin tuna a hawhtlinna chu bul ṭanna a nih thu a sawi. 

Cameroon International Cup 2026 hi September 3 atanga 6 chhung khan Yaounde khawpuiah khelh a ni a. Men's singles-ah kum 19 mi Thazuala hi champion-in gold medal a la. Cameroon International hi Badminton World Federation (BWF) hnuaia inelna niin badminton player naupang beiseiawm zawkten inchher hriamna atana an khelh ṭhin a ni a. Khawvel ram hrang hrang player-ten khelin tun tumah hian mipa inelnaah India player ṭha pahnihin final hi an khel a, Ṭhazuala hian final-ah Tankara Gnana Dattu a hneh a ni.

August thla tawa Nigeria-a Lagos International Badminton Classics-ah pawh Ṭhazuala leh a khingpui Tankara Gnana Dattu bawk hi an inhmachhawn a, hemi tumah hian Zuala hi final-ah vanduaiin silver medal a la thung.

Minister Pu Lalnghinglova Hmar chuan sawi belhin, "Training ṭha zawk mumal taka kan neih hnuah hmasawnna kan nei nasa hle a. Kan player-te zingah tunhnaiah hlawhtlinna nei kan awm chho zel hian Mizote hi India ramah tupawh kan el ve thei a ni tih a tilang a, international inelnaah pawh theihna kan nei tih a lantir." a ti a. "Mi pahnih khat chauh ni lo, mi engemaw zah tunhnaiah che ṭha tak tak kan neihte hian Mizo angin he infiamnaah hian talent kan nei tih a tichiang," a ti a; Empowering Mizoram Sports hnuaiah badminton chu dah pawimawh zingah telin naupang ṭhahnem zawkin an zir mêk zel tih a sawi bawk. 

Mizoram Badminton Association lamin Ṭhazuala an lawmpui thu sawi bawkin Mizoramah inelna sang hmachhawn thei tur badminton player ṭha an chhuah zel theihna tura mamawh leh hmalak dan turte ngaihtuah zel a tul thu an sawi bawk a ni.

Vawiin lawmpuina hunah hian Ṭhazuala hi a nu leh pate bakah Mizoram Badminton Association hruaituten an  ṭawiawm a. Pu C. Lalremsanga, Joint Director, Sports & Youth Services Department bakah S&YS leh Mizoram State Sports Council hotute an tel bawk a ni.