No.7641/2020-2021

Sports & Youth Services Minister Pu Robert Romawia Royte chuan khuallian niin tukin dar 7:30 khan R.Dengthuama Indoor Stadium, Mualpui-ah Mizoram sawrkar flagship programme “Socio-Economic Development Policy (SEDP)” kaltlanga siam insawizawina Outdoor Gym (Open Gym) a hawng a. Pu T.C. Pachhunga, Youth Affairs and Tourism Board Vice-Chairman chu khualzahawm niin, Bamboo Development Board Vice-Chairman Dr. K. Pachhunga, MLA, Road & Infrastructure Development Board Vice-Chairman Er. H Lalzirliana, MLA bakah Sports department offial te an tel a ni.

Outdoor Gym hawnna inkhawm buatsaihah khuallian Pu Robert Romawia Royte chuan mipuite hman tangkai theihna tura outdoor gym hawn a ni ta chu thil lawmawm tak a ni, a ti a. Mizoram mipuite hi India rama mipui fit ber, Mizoram hi India rama State fit ber ni tura hmalak kan tumna tihhlawhtli a ni tih tichiangtu chu Sports Policy mumal tak reilote chhunga kan nei fel thei hi a ni, a ti bawk. Indoor gym hi Mizoten kan hriat lar leh kan hman tangkai a ni a, a tangkai rualin pawn boruak thianghlim hip paha insawizawi theihna outdoor gym hi ram changkang zawkte pawhin an ngaihhlut a ni a, Aizawl khawpuiah hetiang kan nei thei ta hi alawmawm hle a ni, a ti a. MINECO tri-junction a outdoor gym chu nitin darkar 24 chhung mipuite hman theih turin  hawn a ni dawn a ni tiin. hetiang outdoor gym hi a tahtawlin Mizoram chhunga district zawng zawngah dah kan tum a ni, a ti bawk.

Minister chuan COVID-19 hripui leng vangin mipuite hun rei tak kan tawmim a ngai a, sawrkarin ruahmanna a hun tak zelah a rawn siam a, tunah chuan kan zalen ta deuh a, hun tha kan neih hi taksa hriselna atana insawizawina hun remchang atan kan hman tangkai thiam a pawimawh a ni, a ti a. engtiklai pawha kan rilru leh taksa a hrisel theihnan fitness hi kan ngai pawimawh tur a ni a. Nu leh pa te pawhin physical excercise leh activity pawimawhna kan hriatchian a pawimawh a, kan tu leh fate bakah keimahni ngei pawhin rilru leh taksa hrisel kan neih theih nan tan kan lak theuh a ngai a ni, a ti.

Minister chuan Sports School dinna tur cheng nuai 16,000 chuang kan nei tawh tih sawiin, Sports & Youth Services department chuan theihtawp chhuahin infiamna ruhrel siamna turin lungphum 28 lai kan phum tawh a, heng hi sanction kan neihsa atanga a zatve pawh a la ni pha lova, hma kan la zel ang a, a tul angin hmun hrang hrangah lungphum kan phum chhunzawm zel dawn a, tuna lung kan phum tawhna ho ah hian hna bul kan tan vek tawh a, cheng nuai 17,000 man hu vel project ah bul kan tan tawh a ni, a ti.

Khualzahawm Pu T.C. Pachhunga, Youth Affairs and Tourism Board Vice Chairman pawhin thusawiin ram changkang tehfung pakhat chu infiamna leh hriselna lama an dinhmun hi a ni a, hetiang kawng zawh tura sawrkarin hmalakna chhenfakawm tak a nei hi a lawmawm takzet a ni, a ti a. Sum tam tak sen ngai lova mipuiten a thlawna an chhawr tangkai thei tur hi a lawmawm a ni, a ti.

Outdoor Gym (Open Gym), R. Dengthuama Indoor Stadium hi SEDP 2019-20 sum hmanga siam a ni a, Mapuia Enterprise, Ritz Market, Dawrpui, Aizawl chu supply leh installation hna thawk tura thlan an ni. 

Project cost hi Rs. 60,00,000/- a ni a, hetiang hian sum sen a ni.

Gym equipment            - Rs. 55,70,000/-

Site preparation & installation    - Rs. 4,30,000/-

TOTAL                    - Rs. 60,00,000/-                   

A hnuaia tarlan hmanrua te hi outdoor gym-ah hian dah a ni.

Work order/Supply and installation order hi March ni 19, 2020 ah pek a ni a, ni 45 chhunga zo hman tura contractor/supplier hi hriattir a nih laiin, vanduaithlak takin Covid-19 hripui leng avangin a hunah hna tan theih a ni lova. September, 2020-ah hnathawhna tur hmanrua leh bungrua te a lo thleng a, Delhi atanga lokal technician te quarantine an ngaih avangte, an zingah Covid-19 positive an lo awm lehzel avang te in December, 2020 ah hna tan theih chauh a ni.

He Outdoor Gym (Open Gym) hi Mizoram-a “State-of-the-art” outdoor gym hmasa ber a nia hriat a ni a. He gym equipment te hi Arihant Industrial Coorporation Ltd. Mumbai te’n Game Time Company, 150 Playcore Drive SE Fort Payne, Alabama, USA te nen tangkawpa an siam a ni a, chhuat phah hi inhliam hlauhawm loh “Puffed Up” flooring niin, a materials te hi Germany a siam, Malaysia kaltlanga India ram a lakluh a ni.

Sports Minister hian Outdoor Gym a hawn zawh hian March ni 6, 2021 a ‘World Youth Title’ Boxing chuh tura inbuatsaih Mizo boxer-te chu an training-na hmun Hawla Indoor Stadium ah tlawhin an inbuatsaih dante a enpui nghal a ni.

Tukina Outdoor Gym hawnna inkhawm hi Pu H. Lalengmawia, Commissioner & Secretary, Sports & Youth Services department-in a kaihruaia, Mizoram State Sports Council Secretary Pu John Tanpuia’n technical report pe in, Sports Director Pu Lalsangliana’n lawmthu sawina hun a hmang a ni.