No.7300/2020-2021
Tukin zing khan Sports Minister Pu Robert Romawia Royte hovin Dawrpui Multipurpose Committee leh Dawrpui branch YMA hruaituten Dawrpui Multipurpose Centre-ah Fitness Centre dinna atana hmalak dan tur an sawi ho va. Cheng nuai 40 senna tur he Fitness Centre atana hmanraw dah tur te thlir hovin company tha leh rintlak ngei atanga lei ni se, an ti.

Meeting hi Pu Lalrammuana, Chairman, Dawrpui Multipurpose Centre Committee in a kaihruai a. Pu Roberta chuan Aizawl khawpui hmun laili ber Dawrpui vengin Fitness centre changtlung tak a nei tur chu a lawmpui rualin veng bil rilru pu lova mi tam zawkin an chhawr tangkai theih nan rilru zau tak pua enkawl turin a chah lawk a ni. 


Sports Minister hian cheng nuai 540 senga sak mek, Dawrpui Indoor Basketball Court pawh tlawhin hna kalpui dan an thlir a. Tukin zingkar ah vek Venghlui YMA leh khawtlang hruaitu te nen Sports minister chuan Venghlui Indoor Hall pawh a hmunah tlawhin hall sak țhat dan tur an thlir ho a. PWD, MSSC leh Disaster Management ten kar leh lamah enfiahin an thurawn angin Hall chungchang chu bawhzui a nih tur thu a sawi. 


 Pu Robert Romawia hi vawiin khan Pu Rashik Mohan Chakma CEM, CADC chuan a pisaah kawmin Chawngte leh a chhehvela hmasawnna hna thawh tan mekte leh projects thar siam dan tur te an sawi dun a. Chawngte Field-a phullem phah chu kumin May thla chhunga zawh hman beisei a nih thu leh, Community Service Centre, Students Hostel, Volleyball Courts te leh Basketball Courts te pawh Covid hripui a reh zui zel chuan zawh thuai a beiseiawm tih Pu Robert Romawia Royte chuan Pu R.M.Chakma hi a hrilh a ni.

Tourism Minister ni bawk Pu Robert Romawia hi nimin khan LADC CEM Pu Manghmunga Chinzah pawhin a pisaah kawmin Lawngtlai district-a hmasawnna hna thawh dan tur leh ruahmanna thar siam dan turte an sawi dun a, LADC CEM chuan Lawngtlaia sports hmasawnna ruhrel lian tak tak Mizoram Sorkarin a siam tan chhoh mek avangin Sports Minister hi lawmthu a hrilh a. Pu Roberta rawtna angin Bawinu-Beino hmun mawi tak tih changtlun dan tur chu Mara Autonomous District Council (MADC) CEM te nen Video conferencing hmanga sawiho thuai ni se an ti.

Attachment

  • Loading attachment...