No.3146/2020-2020  

Aizawl, the 16th July 2020: Federation of Indian Chamber of Commerce & Industries(FICCI)-in Sports Industry tihhmasawn dan tur leh private company ten Sports hmasawnna atana an tanlak theih dan Online-a sawihona FICCI Webinar nimin tlaia neihah keynote address nei tura sawm a nih angin Sports Minister Pu Robert Romawia Royte chuan sawi hawnna hun a hmang.

He hun hi Ranjit Barthakur Chairman, FICCI NE Advisory Council & Owner, Rajasthan Royals-in kaihruaiin Industry lianten sports hmasawnna atana tanlak a tulzia leh Sports Industry pawimawhnate a sawi a. Ranjit-a, Tata Amalgamated Plantations Chairman ni bawk hian Tata Trusts-in Mizorama Badminton leh Football Project a kalpui dante a sawi bawk.

Webinar sawi hawnna hun hmangtu Sports Minister chuan Pu Robert Romawia Royte North East leh India laipui dawhzawmtu pawimawh chu sports a ni a, North East atangin ISL leh I-League-ah Players 40% chuang an awm a, infiamna ruhrel neilo chungin India chawisangtu an ni a ti a. Mizoram pawhin infiamna hmunhma nei chau em em chungin National Champion te pawh tam tak kan nei thei a ni a ti a.

 Private Company liante Mizoram sports tihmasawn tura sawmin Mizoram sorkar chuan Sports Policy tha tak nen a lo welcome reng a ni a ti. Minister chuan Archery Items pakhat mah Mizorama a awm loh laiin Lalremsanga chuan India aiawhin Olympic-ah Archery a lo khel pha tawh a, International football Ground nei miah lovin Aizawl FC chuan Asia League a khel thei a, Ground tha neih loh vangin Home Ground-ah Guwahati an hman a ngai thung. Mizoten infiamnaa talent an neih thatzia chu tlang hriat a ni a, thawhpui tur tha erawh kan mamawh a, ka sawm che u a ni a ti.

He meeting-ah hian Company lian aiawhte leh Sports Investment Experts ten thusawiin zawhnate an chhang a ni.