Vawiin chawhma dar 11:00AM khan Thuamluaia Mual ah Lunglei High Power Committee bul tum HPC Cup 2011 chu Sports Minister Pu Zodintluanga'n a hawng a. He tournament ah hian Lunglei District chhunga Village Council Team 42 ten thiamber nihna an zawng dawn a ni. He opening funtion ah hian Parliamentary Secretary Pu S.Laldingliana chu khual zahawm niin Pu Joseph Lalhimpuia, Vice Chairman, HPC bakah Lunglei DC Pi M. Zohmingthangi, IAS leh mi pawimawh tam tak an tel bawk. He tournament chhim tur leh inkhel thiam en thli thlai turin MFA hruaitu 4 te pawh Aizawl atangin an rawn kal bawk.

Minister chuan HPC Vice Chairman leh a thawhpui te hmalakna chu Sports ah mai piah lamah Lunglei District chhunga  hmasawnna tam tak lo awm mek te avangin an fakawm thu a sawi a. Mizoram in hunrei lote chhungin infiamna chi hrang hrang ah hma a sawn nasa a ni a ti.Mizo thalai te chuan rilru  an  pek phawt chuan India leh khawvel ah hming an chher thei a ni tih a lang a. India ram football club tha ber ber ah Mizo thalai te chu awm deuh vek tawh in eizawnna ngelnghet an nei der tawh a ni a ti. Pu S.Laldingliana, Parliamentary Secretary paw'n inkhel thiam pungkhawm te chu innelna thiang hlim nei tur leh an thiamna te pholang turin a chah a. Lunglei Thuamluaia Mual ah pawh hun rei vak lo chhung in artificial grass phah theih a beisei awm a ni a ti bawk.

HPC Cup 2011 hawnna inkhawm hi Pu R.Lalnunthara, President, LDFA in a kaihruai a. Inkhelh tan hma hian inkhel thiamte thutiam chhamna C.Lalduhawma, Mizoram State Player in a kaihruai a ni.